2027 جىلعى 1 قاڭتاردان باستاپ قازاقستاندا باسقا ٶڭٸرگە ەرٸكتٸ تٷردە قونىس اۋدارعان ازاماتتارعا كٶشۋ شىعىنىن ٶتەۋ, جالدامالى باسپانا اقىسىن تٶلەۋ جەنە ٷي ساتىپ الۋ ٷشٸن قارجىلاي قولداۋ كٶرسەتٸلەدٸ. تٶرت ادامنان تۇراتىن وتباسى كٶشۋگە ارنالعان بٸرجولعى سۋبسيدييا رەتٸندە 1,3 ملن تەڭگەدەن استام قاراجات الا الادى, دەپ حابارلايدى ult.kz.
ەڭبەك جەنە حالىقتى ەلەۋمەتتٸك قورعاۋ مينيسترٸنٸڭ 2026 جىلعى 13 قازانداعى №401 بۇيرىعىمەن ەرٸكتٸ قونىس اۋدارۋدىڭ جاڭا قاعيدالارى بەكٸتٸلگەن. باعدارلاما جۇمىس كٷشٸ تاپشى ٶڭٸرلەرگە كٶشٸپ, سوندا جۇمىس ٸستەۋگە نەمەسە كەسٸپ اشۋعا دايىن ازاماتتاردى قولداۋعا باعىتتالعان.
قانداي ٶڭٸرلەردەن كٶشۋگە بولادى?
باعدارلاماعا جۇمىس كٷشٸ ارتىق ٶڭٸرلەردٸڭ تۇرعىندارى قاتىسا الادى. ولاردىڭ قاتارىندا:
- الماتى وبلىسى;
- جامبىل وبلىسى;
- ماڭعىستاۋ وبلىسى;
- تٷركٸستان وبلىسى;
- استانا, الماتى جەنە شىمكەنت قالالارى بار.
قونىس اۋدارۋشىلاردى قابىلدايتىن ەلدٸ مەكەندەردٸڭ تٸزٸمٸ بٶلەك بەكٸتٸلەدٸ. سوندىقتان اتالعان ٶڭٸرلەردٸڭ كەز كەلگەنٸنەن كەز كەلگەن ەلدٸ مەكەنگە كٶشە بەرۋگە بولمايدى.
باعدارلاماعا جۇمىسسىز ازاماتتار, سۇرانىسقا يە ماماندىق يەلەرٸ, شارۋا قوجالىقتارىنىڭ باسشىلارى جەنە قانداستار قاتىسا الادى. سونداي-اق جۇمىسقا ورنالاسۋ مٷمكٸندٸگٸ جوعارى ەلدٸ مەكەندەرگە بٸر وبلىستىڭ ٸشٸندە دە قونىس اۋدارۋعا بولادى.
كٶشۋگە قانشا اقشا بەرٸلەدٸ?
بٸرجولعى سۋبسيدييا ەر وتباسى مٷشەسٸنە 70 ايلىق ەسەپتٸك كٶرسەتكٸش (اەك) مٶلشەرٸندە تٶلەنەدٸ.
2027 جىلعا ەسەپ رەتٸندە الىنعان 4 693 تەڭگە مٶلشەرٸندەگٸ اەك بويىنشا بٸر ادامعا 328 510 تەڭگە بەرٸلەدٸ.
وتباسى مٷشەلەرٸنە قاراي تٶلەنەتٸن سۋبسيدييا
- 1 ادام - 328 510 ₸
- 3 ادام - 985 530 ₸
- 4 ادام - 1 314 040 ₸
- 6 ادام - 1 971 060 ₸
ەسەپ 2027 جىلعا بولجانعان اەك مٶلشەرٸ نەگٸزٸندە جاسالعان.
الايدا بۇل قاراجات كٶشۋ بويدا بەرٸلمەيدٸ. ٶتٸنٸش بەرۋشٸ نەمەسە ونىڭ ەڭبەككە قابٸلەتتٸ وتباسى مٷشەسٸ جاڭا ٶڭٸردە كەمٸندە ٷش اي قاتارىنان رەسمي جۇمىس ٸستەپ, ول ٷشٸن ەلەۋمەتتٸك اۋدارىمدار جاسالۋى كەرەك.
جالدامالى باسپاناعا ٶتەماقى تٶلەنەدٸ
مەملەكەت قونىس اۋدارعان ازاماتتاردىڭ جالداۋ اقىسى مەن كوممۋنالدىق قىزمەت شىعىندارىن دا ٶتەيدٸ. تٶلەم مٶلشەرٸ ەلدٸ مەكەنگە جەنە وتباسى مٷشەلەرٸنٸڭ سانىنا بايلانىستى بولادى.
ٶتەماقى ەڭ كٶبٸ 12 ايعا دەيٸن تٶلەنەدٸ. مىسالى, قالاعا كٶشكەن تٶرت ادامنان تۇراتىن وتباسى بٸر جىل ٸشٸندە جالدامالى باسپاناعا 1 407 900 تەڭگەگە دەيٸن ٶتەماقى الا الادى.
بۇل كٶمەكتٸ الۋ ٷشٸن جالداۋ شارتى بولۋى قاجەت. سونىمەن قاتار ٶتٸنٸش بەرۋشٸ نەمەسە ونىڭ ەڭبەككە قابٸلەتتٸ وتباسى مٷشەسٸ جاڭا جەردە كەمٸندە التى اي ٷزدٸكسٸز جۇمىس ٸستەپ, ەلەۋمەتتٸك اۋدارىمدار جاسالعانىن راستاۋى تيٸس.
ەگەر ازامات زاڭنامادا كٶزدەلگەن تەرتٸپپەن مەملەكەتتٸك تۇرعىن ٷي قورىنان باسپانا السا, جالداۋ اقىسى مەن كوممۋنالدىق شىعىندارعا ٶتەماقى بەرٸلمەيدٸ.
ٷي ساتىپ الۋعا 7,6 ملن تەڭگەگە دەيٸن بەرٸلەدٸ
باعدارلاما اياسىنداعى ەڭ ٸرٸ قولداۋ تٷرٸ – ەكونوميكالىق ۇتقىرلىق سەرتيفيكاتى. ونىڭ مٶلشەرٸ 1 625 اەك-كە تەڭ. 2027 جىلعا ەسەپ رەتٸندە الىنعان كٶرسەتكٸش بويىنشا بۇل – 7 626 125 تەڭگە.
سەرتيفيكاتتى قونىس اۋدارعان ٶڭٸردەن ٷي ساتىپ الۋعا نەمەسە يپوتەكانىڭ باستاپقى جارناسىنا پايدالانۋعا بولادى.
ونى الۋ ٷشٸن ازامات جاڭا ٶڭٸردە كەمٸندە 12 اي قاتارىنان رەسمي جۇمىس ٸستەپ, ەلەۋمەتتٸك اۋدارىمدار جاسالعانىن راستاۋى كەرەك.
باسپانا باعدارلاما بويىنشا قونىس اۋدارۋشى تۇراقتى تۇراتىن ەلدٸ مەكەننەن الىنۋى تيٸس. ٷيدٸ جۇبايىنان نەمەسە جاقىن تۋىستارىنان ساتىپ الۋعا رۇقسات ەتٸلمەيدٸ.
ەگەر ساتىپ الىناتىن ٷيدٸڭ قۇنى سەرتيفيكات سوماسىنان تٶمەن بولسا, مەملەكەتتٸك قولداۋ ونىڭ باعالاۋ قۇنىنان اسپايدى. ال سەرتيفيكات ارقىلى ساتىپ الىنعان باسپانا بەس جىلعا دەيٸن ساتىلسا, قاراجاتتى مەملەكەتكە قايتارۋ مٸندەتٸ تۋىنداۋى مٷمكٸن.
تٶرت ادامنان تۇراتىن وتباسى قانشا قاراجات الا الادى?
مىسالى, تٶرت ادامنان تۇراتىن وتباسى باعدارلامانىڭ بارلىق تالاپتارىن ورىنداعان جاعدايدا:
- كٶشۋگە ارنالعان سۋبسيدييا – 1 314 040 تەڭگە;
- قالالىق جالدامالى باسپاناعا بٸر جىلدىق ٶتەماقى – 1 407 900 تەڭگەگە دەيٸن;
- ٷي ساتىپ الۋعا ارنالعان سەرتيفيكات – 7 626 125 تەڭگەگە دەيٸن الا الادى.
وسىلايشا, قولداۋدىڭ جالپى ەسەپتٸك مٶلشەرٸ 10 348 065 تەڭگەگە دەيٸن جەتۋٸ مٷمكٸن. بٸراق بۇل قاراجات بٸردەن بەرٸلمەيدٸ: تٶلەمدەر كەزەڭ-كەزەڭٸمەن تاعايىندالىپ, ەرقايسىسى بويىنشا جەكە تالاپتار ورىندالۋى قاجەت.
قانداي جاعدايدا اقشانى قايتارۋعا تۋرا كەلەدٸ?
قونىس اۋدارعان ازامات جاڭا ٶڭٸردە تۇرۋعا جەنە باعدارلاما تالاپتارىن ورىنداۋعا مٸندەتتٸ. ەگەر ول ٶز ەركٸمەن بەس جىل ٸشٸندە ٶڭٸردەن كەتسە, العان مەملەكەتتٸك قولداۋىن قايتارۋى تالاپ ەتٸلۋٸ مٷمكٸن.
ۋەكٸلەتتٸ ورگان ازاماتقا حابارلاما جٸبەرەدٸ. وعان جاۋاپ بەرۋ ٷشٸن 15 جۇمىس كٷنٸ بەرٸلەدٸ. قاراجاتتى ەرٸكتٸ تٷردە قايتارۋدىڭ ەڭ ۇزاق مەرزٸمٸ – التى اي. اقشا قايتارىلماسا, مەسەلە سوت ارقىلى شەشٸلۋٸ مٷمكٸن.
بۇدان بٶلەك, سوڭعى بەس جىلدا ٷكٸمەت ايقىنداعان ٶڭٸرلەردە جەكە باسپاناسى بولعان ازاماتتارعا نەمەسە جالعان مەلٸمەت ۇسىنعان ادامدارعا قولداۋ كٶرسەتۋدەن باس تارتىلۋى ىقتيمال.
جۇمىس بەرۋشٸلەرگە دە قولداۋ قاراستىرىلعان
جاڭا قاعيدالار بويىنشا باسقا ٶڭٸردەن قىزمەتكەر شاقىراتىن جۇمىس بەرۋشٸلەرگە دە سۋبسيدييا بەرٸلۋٸ مٷمكٸن.
ەگەر كومپانييا قونىس اۋدارۋشىمەن كەمٸندە ەكٸ جىلعا تۇراقتى ەڭبەك شارتىن جاساسا, 400 اەك مٶلشەرٸندە, ياعني ەسەپ بويىنشا 1 877 200 تەڭگە سۋبسيدييا الا الادى. بۇل رەتتە جۇمىس بەرۋشٸ قىزمەتكەردٸڭ كٶشۋ شىعىندارىن ٶتەپ, باسپاناسىن جالداۋ اقىسىن تٶلەۋگە مٸندەتتٸ.
تاعى بٸر نۇسقا بويىنشا, جۇمىس بەرۋشٸ قىزمەتكەرمەن بەس جىلدان استام مەرزٸمگە شارت جاساسىپ, وعان باسپانا ساتىپ الىپ بەرسە, مەملەكەت ناقتى شىعىننىڭ جارتىسىن, بٸراق 5 443 880 تەڭگەدەن اسپايتىن سومانى ٶتەي الادى. مۇنداي جاعدايدا شارتتاعى مٸندەتتەمەلەر ورىندالعان سوڭ باسپانا قىزمەتكەردٸڭ مەنشٸگٸنە بەرٸلۋٸ تيٸس.
بٸر قىزمەتكەر ٷشٸن وسى ەكٸ قولداۋ تٷرٸن قاتار پايدالانۋعا بولمايدى. سونىمەن بٸرگە جۇمىس بەرۋشٸنٸڭ وسى تەتٸگٸ ارقىلى كٶشكەن ازامات جەكە قونىس اۋدارۋشىلارعا ارنالعان سۋبسيدييا مەن تۇرعىن ٷي سەرتيفيكاتىن الا المايدى.
قالاي ٶتٸنٸش بەرۋگە بولادى?
الدىمەن قونىس اۋدارۋدى جوسپارلاعان ەلدٸ مەكەننٸڭ باعدارلاما تٸزٸمٸنە كٸرەتٸنٸن تەكسەرۋ قاجەت. قولجەتٸمدٸ باعىتتار تۋرالى اقپارات ەلەكتروندىق ەڭبەك بيرجاسىندا جارييالانادى.
ٶڭٸرارالىق قونىس اۋدارۋ ٷشٸن ازاماتتى نەمەسە قانداستى قابىلداۋ ٶڭٸرٸنٸڭ كۆوتاسىنا ەنگٸزۋ تۋرالى شەشٸم قاجەت. كٶشكەننەن كەيٸن قاتىسۋشىمەن ەلەۋمەتتٸك كەلٸسٸمشارت جاسالادى.
ٶتٸنٸشتەردٸ ەلەكتروندىق تسيفرلىق قولتاڭبا ارقىلى migration.enbek.kz پورتالى ارقىلى بەرۋگە بولادى.
جاڭا قاعيدالار 2027 جىلعى 1 قاڭتاردان باستاپ كٷشٸنە ەنەدٸ. ال قارجىلاندىرۋ مەن تٶلەمدەردٸ «ازاماتتارعا ارنالعان ٷكٸمەت» مەملەكەتتٸك كورپوراتسيياسى ارقىلى جٷرگٸزۋگە قاتىستى جەكەلەگەن نورمالار شٸلدە ايىنان باستاپ قولدانىلادى.
