فوتو: اقوردا
مەملەكەت باسشىسى – قازاقستان قارۋلى كٷشتەرٸنٸڭ جوعارعى باس قولباسشىسى قاسىم-جومارت توقاەۆ سالتاناتتى جيىندا ساردارلار مەن ساربازداردى الداعى وتان قورعاۋشى كٷنٸمەن قۇتتىقتادى, دەپ حابارلايدى Ult.kz.
سونىمەن قاتار پاتريوتيزم مەن جاۋىنگەرلٸك رۋحتىڭ سيمۆولىنا اينالعان مەرەكە كٷندەرٸ ەلگە قورعان بولىپ جٷرگەن ازاماتتارعا قۇرمەت كٶرسەتۋ, وتان ٷشٸن وت كەشكەن اعا بۋىننىڭ رۋحىنا تاعزىم ەتۋ, ولاردىڭ جانقييارلىعى مەن ٶشپەس ەرلٸگٸن ۇرپاقتىڭ جادىندا جاڭعىرتۋ دەستٷرگە اينالعانىن اتاپ ٶتتٸ.
"قازاق – بولمىسىنان جاۋجٷرەك حالىق. باتىر بابالارىمىز كەڭ-بايتاق جەرٸمٸزدٸ اق بٸلەكتٸڭ كٷشٸمەن, اق نايزانىڭ ۇشىمەن قورعادى. «ەر – ەلدٸڭ ايناسى» دەيدٸ. شىن مەنٸندە, حالقىمىزدىڭ ەرلٸك دەستٷرٸ اتادان بالاعا جالعاسىپ كەلەدٸ. قازاق ساربازى قاي كەزدە دە ەلٸن قورعاي بٸلگەن. جەرٸنٸڭ شەتٸنە جاۋ تيسە, جۇدىرىقتاي جۇمىلىپ بٸر تۋدىڭ استىنان تابىلعان. بيىل ۇلى جەڭٸسكە 80 جىل تولىپ وتىر. ادامزات تاريحىنداعى وسىنداي سۇراپىل سوعىس بارشا ەلدەر ٷشٸن ٷلكەن سىناق بولعانى سٶزسٸز. مايدانعا بٸر ميلليون ەكٸ جٷز مىڭنان استام ازاماتىمىز اتتاندى. ولاردىڭ جارتىسى ۇرىس دالاسىنان ورالعان جوق. تىل ەڭبەككەرلەرٸ كٷن-تٷن دەمەي تەر تٶكتٸ. وسىلايشا, حالقىمىز ۇلى جەڭٸسكە ٶلشەۋسٸز ٷلەس قوستى. جەڭٸس مەرەكەسٸ ەرەن ەرلٸكتٸ پاش ەتەدٸ. سونداي-اق بەيبٸت ٶمٸردٸڭ, بٸرلٸك پەن ىنتىماقتىڭ ماڭىزىن ۇعىندىرادى. جەڭٸس كٷنٸ ارقىلى ۇرپاققا بەرٸلەتٸن ەڭ باستى تاعىلىم – وسى", – دەدٸ قاسىم-جومارت توقاەۆ.
