كٶلٸك پوليتسەيلەرٸ جٷك ۆاگونىنان قۇنى 600 مىڭ تەڭگەگە جۋىق تاۋاردى ۇرلاعان تەمٸرجول جۇمىسشىلارىن ۇستادى, دەپ حابارلايدى "ۇلت اقپارات".
«2019 جىلدىڭ 10 جەلتوقسانىندا قوستاناي ستانتسيياسىنداعى جەلٸلٸك پوليتسييا بٶلٸمٸنە جاۋاپكەرشٸلٸگٸ شەكتەۋلٸ سەرٸكتەستەردٸڭ بٸرٸنٸڭ ٶكٸلٸ شاعىمدانىپ كەلگەن. ونىڭ ايتۋىنشا, «قحر - قوستاناي» باعىتىندا كەلە جاتقان جٷك پويىزىنىڭ ۆاگوندارىنىڭ بٸرٸنەن ميندال سالىنعان 75 قوراپتى بەلگٸسٸز بٸرەۋلەر ۇرلاپ كەتكەن. كٶلٸك پوليتسەيلەرٸ جەدەل-ٸزدەستٸرۋ ٸس-شارالارىن جٷرگٸزۋ بارىسىندا 30 بەن 48 جاس ارلىعىن قۇرايتىن بەس ەر ازاماتتى انىقتاپ, ۇستادى», - دەپ حابارلايدى كٶلٸكتەگٸ پوليتسييا دەپارتامەنتٸنٸڭ باسپاسٶز قىزمەتٸنەن.
تەكسەرۋ بارىسىندا ۇستالعانداردىڭ قاراعاندى وبلىسىنان ەكەنٸ انىقتالعان. تٸپتٸ ولاردىڭ بەرٸ تەمٸرجول ۇيىمىنىڭ قىزمەتكەرلەرٸ بولىپ شىقتى.
كەلتٸرٸلگەن شىعىن سوماسى 590 759 تەڭگەنٸ قۇراپ وتىر. جاۋاپ الۋ كەزٸندە كٷدٸكتٸلەر ٶز كٸنەلارىن مويىندادى. ايعاقتى زاتتار تەركٸلەنٸپ الىندى.
«اتالعان فاكت قر قك-نٸڭ 188-بابى 3-بٶلٸگٸ, ياعني ۇرلىق فاكتٸسٸ بويىنشا سوتقا دەيٸنگٸ تەرگەپ-تەكسەرۋدٸڭ بٸرىڭعاي رەەسترٸنە تٸركەلدٸ. قازٸرگٸ ۋاقىتتا ۇستالعان ازاماتتاردىڭ بۇرىن جاسالعان قىلمىستارعا قاتىسى بار-جوعى انىقتالۋدا», - دەپ حابارلايدى دەپارتامەنتتەن.
