پەتروپاۆل ەۋەجايى ەكٸ رەت ساتىلىمعا شىعارىلىپ, ٶتپەدٸ. جەرگٸلٸكتٸ بيلٸك ماڭىزدى نىساندى سەنٸمگەرلٸك باسقارۋعا بەرٸپ, شىعىندى كەسٸپورىننىڭ جاعدايىن تٷزەمەك, دەپ حابارلايدى قازاقپارات.
سولتٷستٸك قازاقستان وبلىسىنىڭ ەكٸمٸ قۇمار اقساقالوۆتىڭ ايتۋىنشا, ەۋەجاي مٷلكٸ جاقىن ماڭدا تاعى دا ساۋداعا تٷسەدٸ.
«بٸرٸنشٸ ساۋدادا ٶتپەگەندٸكتەن ەكٸنشٸ رەت باعاسىن ەكٸ ەسە ارزانداتۋعا مەجبٷر بولدىق. وسى جولى, ٷشٸنشٸ ساۋدادا العاشقى قۇنىن قايتارامىز, ياعني 5,6 ملرد تەڭگەگە ساۋدالانباق. قىزىعۋشىلار تابىلۋى مٷمكٸن», - دەيدٸ ٶڭٸر باسشىسى.
قۇمار اقساقالوۆتىڭ ايتۋىنشا, جىل سايىن ەۋەجاي جۇمىس ٸستەۋٸ ٷشٸن بيۋدجەتتەن 200 ملن تەڭگە جۇمسالادى.
«قازٸر ەۋەجاي جۇمىس ٸستەپ تۇر. بٸراق اۆياتسييالىق قاۋٸپسٸزدٸك قىزمەتٸ بٸزگە ونداعى ولقىلىقتاردىڭ ورنىن تولتىرىڭدار دەپ ٷنەمٸ ايتادى. مەسەلەن مۇناي قويماسى كەرەك. سوندا ٷلكەن ۇشاقتار ۇشاتىن بولادى, بۇل تاسىمالدى ارتتىرادى. بٸراق بۇل مەسەلەنٸ شەشۋ ٷشٸن ٷلكەن ينۆەستيتسييا قاجەت. كٶپتەگەن مامانداردى تارتۋ قاجەت. ٶكٸنٸشكە وراي, بٸز ەزٸرگە بيۋدجەت قاراجاتىنا بۇل شىعىنداردى ەنگٸزە المايمىز. ينۆەستورلار كەلٸپ, بيزنەستٸ جٷرگٸزۋٸ كەرەك. ول ٷشٸن حالىقارالىق ەۋە كومپانييالارىمەن بايلانىس ورناتىپ, كەلٸسسٶزدەر جٷرگٸزۋ قاجەت. ەكٸمدٸك بۇل شارۋامەن اينالىسا المايدى», - دەدٸ سقو ەكٸمٸ.
بۇعان دەيٸن پەتروپاۆل ەۋەجايىنىڭ ساتىلىمعا شىعارىلعانىن ايتقان ەدٸك.
ساۋدا 12 مامىر كٷنٸ ٶتٸپ, ەۋەجاي ساتىلمادى.
