پەنتاگون 29 تامىزدا اۋعانستاندا امەريكالىق دروننىڭ سوققىسىنان 10 بەيبٸت تۇرعىننىڭ قازا بولعانىن مويىندادى, دەپ جازادى ازاتتىق.
مەرت بولعانداردىڭ جەتەۋٸ – بالا. New York Times باسىلىمىنىڭ حابارلاۋىنشا, امەريكا تاراپى وقيعانى "قايعىلى قاتەلٸك" دەپ اتاعان.
امەريكا ەسكەرٸ جەڭٸل كٶلٸكتەگٸ جارىلعىش زات دەپ ويلاعان نەرسە سۋعا تولى كانيستر بولىپ شىققان. كابۋلدا حالىق كٶپ شوعىرلانعان اۋدانعا ەكٸنشٸ رەت سوققى جاسالعان كەزدە گاز باللونى جارىلعان. تەرگەۋشٸلەر بٸرٸنشٸ سوققى كەزٸندە جارىلعان كٶلٸكتەن ەشقانداي قاۋٸپ بولماعان, وندا بەيبٸت تۇرعىندار وتىردى دەگەن قورىتىندىعا كەلدٸ. ونى امەريكالىق گۋمانيتارلىق ۇيىممەن ۇزاق ۋاقىت ەرٸپتەستٸك ورناتقان ادام جٷرگٸزگەن.
باستاپقىدا امەريكا ەسكەريلەرٸ "يسلام مەملەكەتٸ" ەكسترەميستٸك ۇيىمىنىڭ كابۋلداعى جاسىرىن وشاقتارىنىڭ بٸرٸنە سوققى جاسايمىز دەپ ويلاعان.
اقش قارۋلى كٷشتەرٸ ورتالىق باسقارماسىنىڭ جەتەكشٸسٸ, گەنەرال كەننەت ماككەنزي جۇما كٷنٸ پەنتاگونداعى باسپاسٶز مەسليحاتى كەزٸندە كٶلٸك جٷرگٸزۋشٸسٸ, سوققى كەزٸندە قازا بولعان زەماري احماديدٸڭ وتباسى مەن تۋىستارىنا كٶڭٸل ايتقانىن حابارلادى.
ماككەنزيدٸڭ تٷسٸندٸرۋٸنشە, امەريكا ەسكەرٸ "يسلام مەملەكەتٸ" توبى كابۋلداعى ەۋەجايعا كەزەكتٸ رەت شابۋىل جاساۋعا دايىندىق جاساپ جاتىر دەگەن سەنٸمدە بولعان. ونىڭ الدىندا ٷش كٷن بۇرىن ەۋەجايداعى تەراكت كەزٸندە 140-تان استام ادام قازا بولعان. 13-ٸ – امەريكالىق ەسكەري قىزمەتكەر.
