Pentagon 29 tamyzda Aýǵanstanda amerikalyq dronnyń soqqysynan 10 beibit turǵynnyń qaza bolǵanyn moiyndady, dep jazady Azattyq.
Mert bolǵandardyń jeteýi – bala. New York Times basylymynyń habarlaýynsha, Amerika tarapy oqiǵany "qaiǵyly qatelik" dep ataǵan.
Amerika áskeri jeńil kóliktegi jarylǵysh zat dep oilaǵan nárse sýǵa toly kanistr bolyp shyqqan. Kabýlda halyq kóp shoǵyrlanǵan aýdanǵa ekinshi ret soqqy jasalǵan kezde gaz ballony jarylǵan. Tergeýshiler birinshi soqqy kezinde jarylǵan kólikten eshqandai qaýip bolmaǵan, onda beibit turǵyndar otyrdy degen qorytyndyǵa keldi. Ony amerikalyq gýmanitarlyq uiymmen uzaq ýaqyt áriptestik ornatqan adam júrgizgen.
Bastapqyda Amerika áskerileri "Islam memleketi" ekstremistik uiymynyń Kabýldaǵy jasyryn oshaqtarynyń birine soqqy jasaimyz dep oilaǵan.
AQSh qarýly kúshteri ortalyq basqarmasynyń jetekshisi, general Kennet Makkenzi juma kúni Pentagondaǵy baspasóz máslihaty kezinde kólik júrgizýshisi, soqqy kezinde qaza bolǵan Zemari Ahmadidiń otbasy men týystaryna kóńil aitqanyn habarlady.
Makkenzidiń túsindirýinshe, Amerika áskeri "Islam memleketi" toby Kabýldaǵy áýejaiǵa kezekti ret shabýyl jasaýǵa daiyndyq jasap jatyr degen senimde bolǵan. Onyń aldynda úsh kún buryn áýejaidaǵy terakt kezinde 140-tan astam adam qaza bolǵan. 13-i – amerikalyq áskeri qyzmetker.
