پەكٸستاننىڭ سولتٷستٸك-باتىسىنداعى حايبەر-پاحتۋنحۆا پروۆينتسيياسىندا جۇما نامازى كەزٸندە مەشٸت ماڭىندا قۋاتتى جارىلىس بولدى. وقيعا سالدارىنان كەمٸندە 16 ادام قازا تاۋىپ, 50-دەن استامى جاراقات الدى, دەپ حابارلايدى ult.kz.
جارىلىس كوحات اۋدانىنداعى پوليتسييا باسقارماسى كەشەنٸنٸڭ كٸرەبەرٸسٸندە ورنالاسقان مەشٸتتٸڭ ماڭىندا بولعان. پروۆينتسييا پوليتسيياسىنىڭ باسشىسى زۋلفيكار حاميدتٸڭ مەلٸمەتٸنشە, مەشٸت جانىندا جارىلعىش زات تيەلگەن كٶلٸك جارىلعان.
وسىدان كەيٸن قارۋلى ادامدار مەن قاۋٸپسٸزدٸك كٷشتەرٸ اراسىندا اتىس باستالعان. قاقتىعىس كەزٸندە پوليتسييا باسقارماسى اۋماعىندا تاعى بٸر جارىلىس بولعان.
پوليتسييانىڭ حابارلاۋىنشا, اتىس بارىسىندا التى سودىردىڭ كٶزٸ جويىلعان. ولاردىڭ اراسىندا مەرگەن مەن جانكەشتٸ بولعان.
شابۋىلدان كەمٸندە 16 ادام قازا تاپتى. قازا بولعانداردىڭ بەسەۋٸ – پوليتسييا قىزمەتكەرٸ. بۇدان بٶلەك, 50-دەن استام ادام تٷرلٸ جاراقاتپەن اۋرۋحاناعا جەتكٸزٸلگەن.
جارىلىستىڭ كٷشتٸ بولعانى سونشالىق, مەشٸت ماڭىندا ٷلكەن شۇڭقىر پايدا بولىپ, عيماراتتىڭ سىرتقى بٶلٸگٸنە زاقىم كەلگەن. قابىرعالاردىڭ بٸرٸ وپىرىلىپ قۇلاعان.
كوحات اۋداندىق ورتالىق اۋرۋحاناسىنىڭ باس دەرٸگەرٸ تاحير الي شاحتىڭ ايتۋىنشا, قازٸر 50-دەن استام زارداپ شەگۋشٸ مەديتسينالىق كٶمەك الىپ جاتىر.
