ٶزٸنە پارا ۇسىنىلعانىن حابارلاعان ادامعا 30 اەك جەنە ودان جوعارى كٶلەمدە سىياقى بەرٸلەدٸ. بۇل تۋرالى قر سىبايلاس جەمقورلىققا قارسى ٸس-قيمىل اگەنتتٸگٸنٸڭ 1-شٸ دەپارتامەنتٸنٸڭ اسا ماڭىزدى ٸستەر جٶنٸندەگٸ تەرگەۋشٸسٸ دانييار بەكايداروۆ ايتتى, دەپ حابارلايدى قازاقپارات.
«مەسەلەن اقمولا وبلىسىنداعى تٷزەۋ مەكەمەسٸندە جەدەل ۋەكٸلگە پارا بەرگەنٸ ٷشٸن كٸنەلٸ دەپ تانىلدى. ول جازانى ٶتەۋ جاعدايىن جاقسارتۋ ماسقاتىندا 300 مىڭ تەڭگە پارا بەرمەك بولعان. جەدەل ۋەكٸلگە 50 اەك (نەمەسە 126 250 تەڭگە) اقشالاي سىياقى بەرٸلدٸ», - دەدٸ دانييار بەكايداروۆ اگەنتتٸكتٸڭ بٷگٸنگٸ «انتيكور LIVE» ايدارىندا.
وسىعان ۇقساس جاعداي شىعىس قازاقستاندا دا تٸركەلگەن. 156/18 تٷزەۋ مەكەمەسٸندە جازاسىن ٶتەۋشٸلەردٸڭ بٸرٸ باقىلاۋشىدان تٷرمەدە ۇيالى تەلەفون ۇستاۋعا رۇقسات بەرۋ ٷشٸن پارا ۇسىنعان. الايدا باقىلاۋشى بۇل جايلى جەمقورلىققا قارسى كٷرەس قىزمەتكەرلەرٸنە حابار بەرٸپ, سوتتالعان ادامنىڭ جازاسىنا تاعى 4 جىل قوسىلعان. سوت ٷكٸمٸ كٷشٸنە ەنگەننەن كەيٸن باقىلاۋشىعا دا اقشالاي سىياقى بەرٸلگەن.
«قازٸرگٸ جاعدايدا قوعامنىڭ دەمەۋٸنە ارقا سٷيەپ, وسىنداي قىلمىستاردىڭ بەتٸن اشا الامىز. حالىق بەلسەندٸ بولعان كەزدە عانا جەمقورلىقپەن كٷرەس تيٸمدٸلٸگٸن كٶرسەتەدٸ», - دەيدٸ ول.
