«رەسپۋبليكالىق ەلەكتروندىق دەنساۋلىق ساقتاۋ ورتالىعى» شجق رمك الماتى قالالىق فيليالىنىڭ ديرەكتورى گٷلنار ىسقاقوۆا ونلاين بريفينگ بارىسىندا مٷگەدەكتٸگٸ بار ادامدار كوروناۆيرۋسقا قارسى ۆاكتسينانى قالاي سالدىراتىنىن تٷسٸندٸردٸ, دەپ حابارلايدى قازاقپارات.
ونىڭ ايتۋىنشا, ەگدە جاستاعى ادامدار مەن مٷگەدەكتٸگٸ بار جاندارعا ۆاكتسينا سالۋ ٷشٸن مەديتسينا قىزمەتكەرلەرٸ ٷيلەرٸنە بارمايدى.
«ۆاكتسينانى ٷيگە بارىپ سالمايمىز. ٶيتكەنٸ ۆاكتسينانى مۇزداتىلعان كٷيٸندە ساقتاۋ ٷشٸن بەلگٸلٸ بٸر رەجيم كەرەك. قالاداعى قوعامدىق ورىنداردا ۇيىمداستىرىلعان ەكپە سالۋ ورىندارى ارنايى توڭازىتقىشپەن قامتىلعان, ۆاكتسينا سوندا ساقتالادى. ەگەر جٷرە المايتىن ادامدار ۆاكتسينا العىسى كەلسە, ەمحاناعا حابارلاسا الادى. مۇنداي كەزدە مەديتسينا قىزمەتكەرلەرٸ ەكپە الۋشىنى ەمحاناعا اپارىپ, سول جەردە جاعدايىن تەكسەرٸپ, ۆاكتسينا سالعان سوڭ ٷيٸنە قايتا اپارىپ تاستايدى», - دەيدٸ ول.
سونىمەن قاتار, ول قالاداعى ەكپە سالۋ ورىندارىنىڭ جۇمىس ۋاقىتى ادام كەزەگٸ كٶبەيسە, ۇزارتىلاتىنىن ايتتى.
«قالاداعى ەمحانالار تاڭعى 8.00-دەن كەشكٸ ساعات 20.00-گە دەيٸن جۇمىس ٸستەپ كەلدٸ. سوندىقتان ەكپە سالۋ كەزٸندە دە وسى جۇمىس ۋاقىتىن ساقتايمىز. ەگەر ادامدار لەگٸ كٶپ بولسا, ەمحانا جۇمىس ۋاقىتىن سوزۋعا مەجبٷر بولادى, ياعني سوڭعى كەلۋشٸگە دەيٸن. دەگەنمەن تٷنگٸ ساعات 24:00 كەزٸندە ادامدار ەكپە سالدىرۋعا كەلەدٸ دەپ ويلامايمىن», - دەيدٸ گٷلنار ىسقاقوۆا.
