ٶزبەكستاننىڭ ناۋاي وبلىسىندا قازاقتىڭ بەلگٸلٸ اقىنى بازار جىراۋ وڭداسۇلىنا ەسكەرتكٸش ورناتىلدى. بۇل تۋرالى ٷشقۇدىق اۋدانى ەكٸمدٸگٸنٸڭ باسپاسٶز قىزمەتٸ Telegram كانالىندا مەلٸم ەتتٸ, دەپ حابارلايدى "ۇلت اقپارات".
بالقى بازار جىراۋ بيۋسٸنٸڭ اشىلۋ سالتاناتى 3 قازان كٷنٸ ٶتتٸ. شاراعا اۋدان ەكٸمٸ س.حامروەۆ, ٷشقۇدىق اۋدانى قازاق مەدەني ورتالىعىنىڭ قىزمەتكەرلەرٸ, اعا بۋىن جەنە باق ٶكٸلدەرٸ قاتىستى.
بيۋست ورناتار الدىندا جالپاقتاۋداعى بازار جىراۋدىڭ بەيٸتٸ اباتتاندىرىلعان.
بازار جىراۋ وڭداسۇلى 1842 جىلى قازاقستان رەسپۋبليكاسى قىزىلوردا وبلىسىنىڭ قارماقشى اۋدانىندا دٷنيەگە كەلگەن. ەل اراسىندا بالقى بازار دەپ تانىلعان. ٶمٸرٸنٸڭ سوڭعى جىلدارىن جالپاقتاۋ جايلاۋىندا, اقبٶگەت توپىراعىندا ٶتكٸزدٸ. 1911 جىلى دٷنيە سالىپ, جالپاقتاۋعا سٷيەگٸ قويىلعان.
بازار جىراۋدى سىر بويىنىڭ اقىن-جىراۋلارى, تەرمەشٸلەرٸ ٶزدەرٸنە ۇستاز ساناعان. ونىڭ تۋىندىلارى «تەرمە», «ٷش عاسىر جىرلايدى» جيناقتارىنا ەنگەن.
