بٸر اپتا بۇرىن ۆاتساپ ەلەۋمەتتٸك جەلٸسٸندە بەرسيەۆ وكرۋگٸنەن تابىلعان ەسكٸ قۇمىرا سۋرەتٸ جارييالانادى. سۋرەتكە سەيكەس سۇراستىرۋ جۇمىستارى جٷرگٸزٸلگەن كەزدە كەزدەيسوق تابىلعان ولجا بولىپ شىعادى. بۇل ولجانىڭ تابىلعان جەرٸ - ەرتە دەۋٸرلەردە ادامدار تۇراقتاعان "قازدىارال" تۇراعى.
تابىلعان قۇمىرانى قاراستىرىپ, زەرتتەۋگە الىپ كەتۋ ماقساتىندا بارلاۋ جۇمىسى اقتٶبە وبلىستىق تاريحي-ٶلكەتانۋ مۋزەيٸنٸڭ ارحەولوگ مامانى اسلان مامەدوۆتٸڭ كٶمەگٸمەن ۇيىمداستىرىلادى. بارلاۋ جۇمىسى بارىسىندا كەزدەيسوق تابىلعان قۇمىرا باسقا جەرگە قايتا كٶمٸلگەندٸگٸ انىقتالادى. كٶمٸلگەن جەردە ٸزدەستٸرۋ جٷرگٸزۋ بارىسىندا ەرتە كەزەڭدەگٸ قاۋىمنىڭ جەرلەنگەندٸگٸ انىق بايقالدى.
ارحەولوگ اسلان مامەدوۆتٸڭ مەتوديكالىق كٶمەگٸمەن كەلەسٸ كٷنٸ ەكسپەدييا قۇرامى جاساقتالىپ, "قازدىارال" تۇراعىنا قازبا جۇمىستارى جٷرگٸزٸلەدٸ. نەگٸزگٸ قابٸرٸ ساقتالعان 3 جەردٸڭ ورنى اشىلادى. ەكٸ قايتا كٶمٸلگەن سٷيەكتەرٸ بار شۇڭقىرلار قازىلدى. نەتيجەسٸندە ەرتە قولا دەۋٸرٸ مەن ورا عاسىر كەزەڭٸنە جاتاتىن ارحەولوگييالىق جەدٸگەرلەر اشىلىپ, سۋرەتتەلدٸ.
عىلىمي جاعىنان تابىلعان زاتتاردىڭ ماڭىزدىلىعى جوعارى. تەرەڭ زەرتتەۋدٸ قاجەت ەتەدٸ. وسى ارحەولوگييالىق قازبا جۇمىستارىنىڭ ۇيىمداستىرىلۋىنا اتسالىسقاندار - ارحەولوگ اسلان مەلٸكۇلى, ويىلدىق جاس عىلىم جاناشىرلارى مىرزاعاليەۆ بەكەت پەن دەۋلەت تاپاشەۆ پەن ويىل اۋداندىق مۋزەيٸنٸڭ قىزمەتكەرٸ قۇلمۇحانوۆ مەدەت.
جوعارىدا اتالعان جاعدايلاردان كەيٸن شىعاناق بەرسيەۆ مۋزەيٸ ٶزٸنٸڭ العاشقى, عىلىمي تۇرعىداعى ارحەولوگييالىق قازبا جۇمىسىن ۇيىمداستىردى.
