فوتو: ۆيدەودان سكرينشوت/inform.kz
تٷركٸستان وبلىسىندا شيبٶرٸ اۋىل ٸشٸنە كٸرٸپ, ادامدارعا شابۋىلداعان. وقيعا ساعات 17:00 شاماسىندا بولعان, دەپ حابارلايدى Ult.kz "قازاقپاراتقا" سٸلتەمە جاساپ.
تۇرعىنداردىڭ ايتۋىنشا, جىرتقىش كٶشەدە ويناپ جٷرگەن 2 بالاعا تاپ بەرگەن. سالدارىنان 15 جاستاعى جاسٶسپٸرٸم مەن 4 جاسار قىز زارداپ شەكتٸ.
كٶمەككە كەلگەن اۋىل تۇرعىنى تالعات مىڭباەۆ شيبٶرٸنٸ ۇرىپ ٶلتٸرگەن. الايدا بالالاردى اراشالاماق بولعان كەزدە جىرتقىش وعان دا شابۋىلداپ, جاراقاتتاعان. وقيعادان كەيٸن ولار دەرەۋ وتىرار اۋداندىق ورتالىق اۋرۋحاناسىنىڭ قابىلداۋ بٶلٸمٸنە جەتكٸزٸلدٸ.
وبلىس ەكٸمدٸگٸنٸڭ حابارلاۋىنشا, ۆەتەرينارييالىق قىزمەت ماماندارى شيبٶرٸدەن قۇتىرۋ اۋرۋىنا كٷدٸكتٸ پاتولوگييالىق ماتەريال الىپ, اۋداندىق زەرتحاناعا جولدادى.
– زارداپ شەككەندەرگە قۇتىرۋعا قارسى پروفيلاكتيكالىق ەكپە سالىندى. قازٸرگٸ تاڭدا ولاردىڭ جاعدايى تۇراقتى, دەرٸگەرلەردٸڭ باقىلاۋىندا. بٸر ادام اۋرۋحانادا ەم قابىلداپ جاتىر, – دەلٸنگەن حابارلامادا.
ينفەكتسييانىڭ تارالۋىنىڭ الدىن الۋ ماقساتىندا شيبٶرٸ انىقتالعان اۋماق پەن زارداپ شەككەن تۇرعىنداردىڭ اۋلالارى زالالسىزداندىرىلدى.
جاعداي تيٸستٸ قىزمەتتەردٸڭ باقىلاۋىنا الىنعان.
