ٶسكەمەن قالاسىندا وقۋشى قىز شۇڭقىرعا قۇلاپ كەتتٸ, دەپ حابارلايدى قازاقپارات.
شقو تٶتەنشە جاعدايلار دەپارتامەنتٸ باسپاسٶز قىزمەتٸنٸڭ مەلٸمەتٸنە سٷيەنسەك, 30 قازان كٷنٸ ساعات 16.10-دا گەولوگيچەسكايا كٶشەسٸنٸڭ ماڭىندا جاسٶسپٸرٸم شۇڭقىرعا قۇلاپ كەتكەن. وقيعا ورنىنا قۇتقارۋشىلار شۇعىل كەلٸپ جەتتٸ.
«مامانداندىرىلعان جاساق قىزمەتكەرلەرٸ 15 جاستاعى قىزدى شۇڭقىردان ارقانمەن الىپ شىقتى. سودان كەيٸن وقۋشى جەدەل جەردەم دەرٸگەرلەرٸنە تاپسىرىلدى», - دەپ حابارلادى ۆەدومستۆو ٶكٸلدەرٸ.
دەپارتامەنت ماماندارى ٶڭٸر جۇرتشىلىعىنا قاۋٸپسٸزدٸك ەرەجەلەرٸن ساقتاۋ قاجەتتٸگٸن ەسكەرتەدٸ. اتا-انالار قانداي جاعداي بولماسىن بالالاردى قاراۋسىز قالدىرماۋى كەرەك.
