وڭتٷستٸك قازاقستان وبلىسىندا نٶسەر جاۋىننان ارىق اتىزداردا سۋ تاسىپ, تۇرعىن ٷيلەرگە كٸرٸپ جاتىر. ٷش كٷن بويى تولاسسىز جاۋعان جاڭبىردان جەراستى سۋلارى دا كٶتەرٸلٸپ كەتكەن, دەپ حابارلايدى ۇلت.كز تٸلشٸسٸ قازاقپارات اگەنتتٸگٸنە سٸلتەمە جاساپ.
سەۋٸر ايى باستالا سالىسىمەن تولاسسىز جاۋعان جاڭبىردان ماقتارال اۋدانىندا جەراستى سۋلارى كٶتەرٸلٸپ, جۇرتتى ەبٸگەرگە سالدى. سالدارىنان جەتٸساي قالاسىنداعى ٷيلەرگە سۋ كٸرٸپ, قازٸر مۇندا سۋ سورۋ جۇمىستارى جٷرگٸزٸلٸپ جاتىر. بۇل جۇمىستارعا جەرگٸلٸكتٸ ەكٸمدٸك پەن تٶتەنشە جاعداي قىزمەتٸنەن 12 ادام مەن 3 تەحنيكا جۇمىلدىرىلدى.
ال, شىمكەنتتە جاڭبىردان كٶشەلەر مەن اۋلالارعا سۋ تولىپ, تۇرعىنداردىڭ جٷرٸپ تۇرۋىن قيىنداتىپ جٸبەردٸ. قالاداعى تەجٸباي اتا, قوجانوۆ كٶشەلەرٸندەگٸ تۇرعىن ٷيلەردٸڭ اۋلالارىنا سۋ جينالىپ, مۇندا دا سۋ سورۋ جۇمىستارى قولعا الىندى. شاھاردىڭ تٶتەنشە جاعداي قىزمەتٸنەن 13 ادام مەن 3 تەحنيكادان قۇرالعان توپ اۋلالاردى سۋدان تازارتتى.
دەل وسىنداي جاعداي سايرام اۋدانى مەن وتىرار اۋدانىندا دا قالىپتاستى. تەمٸر اۋىلى ماڭىنان ٶتەتٸن ارىس ٶزەنٸ بويىندا بٶگەتتەر جاسالىپ, تاسقىننىڭ الدىن الۋ شارالارى جٷرگٸزٸلدٸ. وعان جەرگٸلٸكتٸ تۇرعىندار مەن تٶتەنشە جاعداي قىزمەتٸنٸڭ 60 ادام مەن 4 تەحنيكا جۇمىلدىرىلىپ, ۇزىندىعى 15 مەتردەي بولاتىن بٶگەت جاسالدى.
ايتا كەتەيٸك, دەمالىس كٷندەرٸ ارىس ٶزەنٸنٸڭ ٷستٸندەگٸ جاڭادان سالىنعان كٶپٸردٸڭ ەكٸ جانىن سۋ شايىپ, قاۋٸپتٸ جاعداي تۋعىزعان بولاتىن. نەتيجەسٸندە «باتىس قىتاي - باتىس ەۋروپا» دەلٸزٸ بويىندا ورنالاسقان ٶتكەلدٸڭ جاعدايى قاۋٸپتٸ بولۋىنا بايلانىستى بۇل جەردەن كٶلٸكتەردٸڭ قوزعالىسى توقتاتىلعان ەدٸ. تٶتەنشەلٸكتەر ونىڭ سەبەبٸن جامبىل وبلىسىنان كەلەتٸن بورولداي ٶزەنٸنٸڭ سۋ دەڭگەيٸ 40 سانتيمەترگە دەيٸن كٶتەرٸلٸپ, ارىس ٶزەنٸنە كٶپ مٶلشەردە سۋ جٸبەرٸلۋٸنەن تۋىنداعان دەپ تٷسٸندٸردٸ. سۋدىڭ قاتتى اعىسىنا شىداس بەرمەگەن كٶپٸردٸڭ جاقتاۋلارى بۇزىلىپ, ارىسقا جٸبەرٸلگەن سۋدىڭ دەڭگەيٸ تٶمەندەتٸلدٸ. كٶپٸر ماڭىندا قايتا قالپىنا كەلتٸرۋ جۇمىستارىن جٷرگٸزۋ ٷشٸن 18 ادام مەن 7 تەحنيكا جۇمىلدىرىلعان بولاتىن.
