مەملەكەت باسشىسىنىڭ تاپسىرماسى بويىنشا قازاقستان رەسپۋبليكاسىنىڭ پرەمەر-مينيسترٸ ولجاس بەكتەنوۆ قىسقا مەرزٸمدٸ جۇمىس ساپارىمەن قىرعىز رەسپۋبليكاسىنا باردى, دەپ حابارلايدى "ۇلت اقپارات".
بٸشكەكتە قازاقستان ٷكٸمەتٸنٸڭ باسشىسىن قىرعىزستان پرەزيدەنتٸ سادىر جاپاروۆ قابىلدادى.
ولجاس بەكتەنوۆ مەملەكەت باسشىسى قاسىم-جومارت توقاەۆتىڭ سەلەمٸن جەتكٸزٸپ, قازاقستان ٷكٸمەتٸ ەكٸجاقتى ساۋدا-ەكونوميكالىق ىنتىماقتاستىقتى ودان ەرٸ دامىتۋ ٷشٸن بار كٷش-جٸگەردٸ جۇمساۋعا دايىن ەكەنٸن بٸلدٸردٸ.
قىرعىزستان مينيسترلەر كابينەتٸنٸڭ تٶراعاسى – پرەزيدەنت ەكٸمشٸلٸگٸنٸڭ باسشىسى اقىلبەك جاپاروۆپەن ٷكٸمەتتٸك دەڭگەيدەگٸ كەلٸسسٶز بارىسىندا پرەزيدەنت سادىر جاپاروۆتىڭ قازاقستانعا الداعى رەسمي ساپارىنا دايىندىق مەسەلەسٸ قارالدى.
تاراپتار ٶزارا تاۋار اينالىمىن $2 ملرد-قا دەيٸن ۇلعايتۋ جٶنٸندەگٸ بٸرلەسكەن شارالاردى تالقىلادى. ونىڭ ٸشٸندە ەكٸ ەلدٸڭ ساۋدا-ەكونوميكالىق ىنتىماقتاستىعىن نىعايتۋعا باعىتتالعان ناقتى جوبالارعا نازار اۋدارىلدى.
قازاقستان $260 ملن سوماسىنا 195 تاۋار پوزيتسيياسى بويىنشا ەكسپورتتى ۇلعايتۋعا دايىن.
ازىق-تٷلٸك, ٶنەركەسٸپ, مۇناي-حيمييا, قۇرىلىس, فارماتسەۆتيكا جەنە باسقا دا سالالاردىڭ ەلەۋەتٸ زور.
سونداي-اق بۇعان شەكارا ماڭىندا يندۋسترييالىق ساۋدا-لوگيستيكالىق كەشەن قۇرۋ تۋرالى جوسپارلار دا ىقپال ەتەدٸ.
اتالعان جوبانىڭ ٸسكە قوسىلۋى مۋلتيپليكاتيۆتٸ ەسەرگە يە بولىپ, ساۋدا-ەكونوميكالىق جەنە ينۆەستيتسييالىق بايلانىستارعا قوسىمشا سەرپٸن بەرەدٸ.
اۋىل شارۋاشىلىعىنداعى ىنتىماقتاستىقتىڭ ەلەۋەتٸن تولىققاندى اشۋ ٷشٸن ەكٸ ەلدٸڭ ٷكٸمەتتەرٸ ٶنٸمدەردٸڭ ٶزارا تاسىمالىن ۇلعايتۋ جەنە بٸرلەسكەن جوبالاردى ٸسكە قوسۋ جٶنٸندە شارالار قابىلدايتىن بولادى, سونداي-اق ەكٸ ەلدٸڭ عىلىمي-زەرتتەۋ ينستيتۋتتارى مەن اگرارلىق جوعارى وقۋ ورىندارى اراسىنداعى بەلسەندٸ ٶزارا ٸس-قيمىل جالعاسادى.
ولجاس بەكتەنوۆ 2024 جىلعى ۆەگەتاتسييالىق كەزەڭدە مەملەكەتارالىق پايدالانۋداعى سۋ شارۋاشىلىعى وبەكتٸلەرٸنٸڭ جۇمىس رەجيمدەرٸن بەكٸتۋدٸڭ ماڭىزىن اتاپ ٶتتٸ.
سونىمەن قاتار تاراپتار قازاق-قىرعىز شەكاراسىنىڭ ٶتكٸزۋ قابٸلەتٸن جەنە جٷك تاسىمالداۋشىلار ٷشٸن ترانزيتتٸ تارتىمدى ەتۋ باعىتىندا اتقارىلىپ جاتقان جۇمىس قارقىنىن اتاپ ٶتتٸ.
قازاقستاننىڭ ترانزيتتٸك كٶلٸك ەلەۋەتٸن دامىتۋدىڭ 2030 جىلعا دەيٸنگٸ تۇجىرىمداماسىنا سەيكەس «قاراسۋ», «بەساعاش», «اۋحاتتى», «سارتٶبە» «ايشا بيبٸ», «سىپاتاي باتىر», «كەگەن» ٶتكٸزۋ بەكەتتەرٸن سالۋ جەنە رەكونسترۋكتسييالاۋ كٶزدەلٸپ وتىر.
كەزدەسۋ بارىسىندا تاراپتار بٸلٸم, مەدەنيەت جەنە تۋريزم سالالارىنداعى ٶزارا ٸس-قيمىل مەسەلەلەرٸن دە تالقىلادى.
كەلٸسسٶز قورىتىندىسى بويىنشا ەكٸ ەلدٸڭ مەملەكەت باسشىلارى قويعان مٸندەتتەردٸڭ بارلىعىن تولىق كٶلەمدە ٸسكە اسىرۋعا جەنە قازاق-قىرعىز ىنتىماقتاستىعىن جاڭا دەڭگەيگە كٶتەرۋگە دايىندىق مەسەلەسٸ ناقتىلاندى.
