فوتو: gov.kz
دٷنيەجٷزٸلٸك بانك ساراپشىلارىنىڭ قازاقستان وقۋشىلارىنىڭ ساۋاتىنا قاتىستى دەرەگٸ - جاۋىر بولعان اقپارات. بۇل تۋرالى وقۋ-اعارتۋ مينيسترٸ عاني بەيسەمباەۆ ايتتى, دەپ حابارلايدى Kazinform اگەنتتٸگٸ.
بٷگٸن ٷكٸمەت وتىرىسىنان كەيٸن ۇيىمداستىرىلعان بريفينگتە باق ٶكٸلدەرٸ مينيستردەن «دٷنيەجٷزٸلٸك بانك ساراپشىلارى قازاقستانداعى مەكتەپ وقۋشىلارىنىڭ 64 پايىزى فۋنكتسيونالدىق تۇرعىدا ساۋاتسىز دەگەن ەكەن. بۇل پٸكٸرمەن كەلٸسەسٸز بە? بٸلٸم ساپاسى مەكتەپتەردە سونشالىقتى ناشار ما?» دەپ سۇراعان ەدٸ.
مينيستر مۇنداي تۇجىرىممەن كەلٸسپەيتٸنٸن قاداپ ايتتى.
«جالپى, بۇل پٸكٸرمەن مٷلدە كەلٸسپەيمٸن. دٷنيەجٷزٸلٸك بانكتٸڭ ايتىپ وتىرعانى — ەسكٸرگەن, جاۋىر بولعان اقپارات. 2018 جىلدان بەرٸ كەلە جاتقان دٷنيەلەر. ودان بەرٸ قانشاما ۋاقىت ٶتتٸ, ساپانى كٶتەرۋ باعىتىندا قانشاما جۇمىس اتقارىلىپ جاتىر. بۇل تۋرالى بٸز ٷنەمٸ اشىق ايتىپ وتىرامىز. وقۋشىلارىمىزدىڭ دەڭگەيٸ وسىنداي دەگەن سٶزدٸڭ شىندىققا جاناسپايتىنىن ايتقىم كەلەدٸ», — دەدٸ عاني بەيسەمباەۆ.
سونىمەن قاتار ول بالالارىنىڭ ٷيگە جاقىن مەملەكەتتٸك مەكتەپتە بٸلٸم الاتىنىن اتاپ ٶتتٸ.
«قاراپايىم مەكتەپ. مۇعالٸمدەرٸ دە, وقۋ پروتسەسٸ دە كٶڭٸلٸمنەن شىعادى. قولىم تيگەندە بالالارىمنىڭ ساباعىن قاراپ وتىرامىن. باعاسىن قاداعالاۋ ٷشٸن عانا ەمەس, تٷسٸندٸرگەن, وقىعان ساباقتارىن جەتكٸزۋدە جاقسى قالىپتاسقان بٸلٸمٸنٸڭ بار ەكەنٸن بايقادىم», — دەدٸ مينيستر.
