قۇربان ايت مەرەكەسٸنٸڭ العاشقى كٷنٸ استاناداعى «ەزٸرەت سۇلتان» مەشٸتٸنە كەلگەن قازاقستان پرەزيدەنتٸ نۇرسۇلتان نازارباەۆ قازاقستاندىقتاردى مۇسىلمانداردىڭ ۇلىق مەرەكەسٸمەن قۇتتىقتادى, دەپ حابارلايدى قازاقپارات تٸلشٸسٸ.
«قۇرمەتتٸ وتانداستارىم! بارشالارىڭىزدى بٷگٸنگٸ مۇسىلمانداردىڭ ۇلىق مەرەكەسٸ - قۇربان ايت كٷنٸمەن قۇتتىقتايمىن. مەنٸڭ جارلىعىممەن بۇل كٷن بٷكٸل مۇسىلماندارعا, حالقىمىزعا, قازاقستانعا جۇمىستان ەلدەر بوساتىلىپ, وسى نامازىن, پارىزىن ورىنداسىن دەپ, مەيرام دەپ جارييالانعان. وسى ايلاردىڭ ٸشٸندە حالقىمىز ناماز وقىپ, قۇلشىلىق جاساپ, اللادان تٸلەك تٸلەدٸ. «قۇربان» دەگەن سٶز - اللاعا جاقىنداۋ دەگەن سٶز. قولىنان كەلەتٸن ازاماتتار قۇربان شالىپ, تٸلەگٸن تٸلەپ جاتىر. بۇل - اللانىڭ كٶرسەتكەن جولى, پايعامباردىڭ ٸزٸ. ەرقايسىڭىز ەلدٸڭ تىنىشتىعىن, بالا-شاعانىڭ امانشىلىعىن بولاشاقتا ويلاپ, ناماز وقىپ, تٸلەۋ تٸلەگەن شىعارسىزدار. سول تٸلەكتٸڭ بارلىعى ەلٸمٸزدە ورىندالسىن», - دەدٸ پرەزيدەنت قۇتتىقتاۋىندا.
ەلباسى ٶز سٶزٸندە قۇربان ايت - قازاقتىڭ دەستٷرٸمەن ٷندەس مەرەكە ەكەنٸن اتاپ ٶتتٸ.
«بۇل بٸرٸنشٸدەن, ەلدٸڭ بٸرلٸگٸ, بولاشاعى, ەكٸنشٸدەن يمان, قاناعات, قايىرىمدىلىق دەگەندٸ بٸلدٸرەدٸ. بۇل كٷندەرٸ اعايىن-تۋىسقان بٸر-بٸرٸمەن قاۋىشىپ, بٸر-بٸرٸنٸڭ ٷيٸندە دەم تاتىپ, كەمتارلارعا كٶمەكتەسٸپ, جاقسىلىق جاسايدى. وسى كٷنٸ قازاقتىڭ ازاماتتارى «رۋحاني جاڭعىرۋ» باعدارلاماسىمەن ٶزٸنٸڭ تۋعان جەرٸنە, اۋىلىنا جاقسىلىق جاساپ, قاراجاتىن سالىپ, اۋرۋحانا, بالاباقشا, مەكتەپ بارلىعىن جاساپ جاتىر. وسى قايىرىمدىلىق تا ساۋاپتى بولادى دەپ ەسەپتەيمٸز. ونى جالعاستىرا بەرۋ كەرەك», - دەدٸ نۇرسۇلتان نازارباەۆ.
پرەزيدەنت سونىمەن بٸرگە, ەڭ باستىسى ەلٸمٸزدٸڭ بٸرلٸگٸ ەكەنٸن اتاپ ٶتتٸ.
«مۇسىلماندىق دەگەن - قانداي ۇلت بولسىن بارلىق مۇسىلماندار بٸر-بٸرٸمەن باۋىر-تۋىسقان بولىپ سانالادى. سونى ۇمىتپاۋىمىز كەرەك. وسى قاعيداتتى بٸز دە ۇستاپ كەلە جاتىرمىز. جاقىن ارادا بٸزدە دٷنيەجٷزٸلٸك دٸندەر باسشىلارىنىڭ التىنشى سەزٸ ٶتەتٸن بولادى. قازاقستانىمىزدىڭ جەرٸ قاسيەتتٸ دەپ, ەلدٸڭ بەرٸ جينالادى. سەبەبٸ, بٸزدە بٸرلٸك بار, اۋىزبٸرشٸلٸك بار, بٸر-بٸرٸن سىيلاۋ, قۇرمەتتەۋ بار. قادٸرلەيدٸ بٸزدٸڭ حالقىمىزدى. قورىقپاي كەلٸپ, ٶزدەرٸنٸڭ جۇمىستارىن اتقارادى. سوندىقتان, قۇربان ايت قۇتتى بولسىن. قۇربان شالۋ - تەك قانا قولىنان كەلەتٸن ازاماتتاردىڭ جاسايتىن ٸسٸ بولادى. قۇربان مەرەكەسٸ - تەك قۇربان شالۋمەن اياقتالمايدى, قاي جەردە جٷرسە دە ادامنىڭ نيەتٸ, كٶڭٸلٸ تازا جٷرۋ كەرەك. سوندا بارلىعى قابىل بولادى. دەنساۋلىق, بالا-شاعاڭىزعا, جانۇياڭىزعا بەرەكە-بٸرلٸك, باياندى بولاشاق تٸلەيمٸن», - دەپ تٷيدٸ پرەزيدەنت.
ايتا كەتسەك, بٷگٸن مۇسىلمانداردىڭ قاسيەتتٸ مەرەكەسٸ - قۇربان ايت باستالدى.
