Qurban ait merekesiniń alǵashqy kúni Astanadaǵy «Áziret Sultan» meshitine kelgen Qazaqstan Prezidenti Nursultan Nazarbaev qazaqstandyqtardy musylmandardyń ulyq merekesimen quttyqtady, dep habarlaidy QazAqparat tilshisi.
«Qurmetti otandastarym! Barshalaryńyzdy búgingi musylmandardyń ulyq merekesi - Qurban ait kúnimen quttyqtaimyn. Meniń Jarlyǵymmen bul kún búkil musylmandarǵa, halqymyzǵa, Qazaqstanǵa jumystan elder bosatylyp, osy namazyn, paryzyn oryndasyn dep, meiram dep jariialanǵan. Osy ailardyń ishinde halqymyz namaz oqyp, qulshylyq jasap, Alladan tilek tiledi. «Qurban» degen sóz - Allaǵa jaqyndaý degen sóz. Qolynan keletin azamattar qurban shalyp, tilegin tilep jatyr. Bul - Allanyń kórsetken joly, Paiǵambardyń izi. Árqaisyńyz eldiń tynyshtyǵyn, bala-shaǵanyń amanshylyǵyn bolashaqta oilap, namaz oqyp, tileý tilegen shyǵarsyzdar. Sol tilektiń barlyǵy elimizde oryndalsyn», - dedi Prezident quttyqtaýynda.
Elbasy óz sózinde Qurban ait - qazaqtyń dástúrimen úndes mereke ekenin atap ótti.
«Bul birinshiden, eldiń birligi, bolashaǵy, ekinshiden iman, qanaǵat, qaiyrymdylyq degendi bildiredi. Bul kúnderi aǵaiyn-týysqan bir-birimen qaýyshyp, bir-biriniń úiinde dám tatyp, kemtarlarǵa kómektesip, jaqsylyq jasaidy. Osy kúni qazaqtyń azamattary «Rýhani jańǵyrý» baǵdarlamasymen óziniń týǵan jerine, aýylyna jaqsylyq jasap, qarajatyn salyp, aýrýhana, balabaqsha, mektep barlyǵyn jasap jatyr. Osy qaiyrymdylyq ta saýapty bolady dep esepteimiz. Ony jalǵastyra berý kerek», - dedi Nursultan Nazarbaev.
Prezident sonymen birge, eń bastysy elimizdiń birligi ekenin atap ótti.
«Musylmandyq degen - qandai ult bolsyn barlyq musylmandar bir-birimen baýyr-týysqan bolyp sanalady. Sony umytpaýymyz kerek. Osy qaǵidatty biz de ustap kele jatyrmyz. Jaqyn arada bizde Dúniejúzilik dinder basshylarynyń altynshy sezi ótetin bolady. Qazaqstanymyzdyń jeri qasietti dep, eldiń bári jinalady. Sebebi, bizde birlik bar, aýyzbirshilik bar, bir-birin syilaý, qurmetteý bar. Qadirleidi bizdiń halqymyzdy. Qoryqpai kelip, ózderiniń jumystaryn atqarady. Sondyqtan, Qurban ait qutty bolsyn. Qurban shalý - tek qana qolynan keletin azamattardyń jasaityn isi bolady. Qurban merekesi - tek qurban shalýmen aiaqtalmaidy, qai jerde júrse de adamnyń nieti, kóńili taza júrý kerek. Sonda barlyǵy qabyl bolady. Densaýlyq, bala-shaǵańyzǵa, januiańyzǵa bereke-birlik, baiandy bolashaq tileimin», - dep túidi Prezident.
Aita ketsek, búgin musylmandardyń qasietti merekesi - Qurban ait bastaldy.
