بەلگٸسٸز ادام مەسكەۋ-سامارا پويىزىندا نوبەل سىيلىعىنىڭ يەگەرٸ, "نوۆايا گازەتا" باسىلىمىنىڭ باس رەداكتورى دميتريي مۋراتوۆقا اتسەتون ارالاسقان مايلى بوياۋ شاشىپ كەتتٸ. بۇل تۋرالى ول "نوۆايا گازەتا.ەۋروپا" باسىلىمىنا ايتتى.
وقيعانىڭ قاي جەردە بولعانى ناقتىلانبادى. كەشكٸ 08:10 ۋاقىتىندا قازانداعى ۆوكزالدان "جيگۋلي" پويىزى جٷرگەن. شاماسى ول سول پويىزدا بولعان. "نوۆايا گازەتا.ەۋروپا" باسىلىمىندا پويىزدىڭ توقتاتىلعانى ايتىلادى. مۋراتوۆتىڭ سٶزٸنشە, شابۋىلداعان ادام "مۋراتوۆ, بۇل ساعان بٸزدٸڭ جٸگٸتتەر ٷشٸن" دەپ ايتقان.
مۋراتوۆ 2021 جىلعى قازاندا فيليپپين جۋرناليسٸ مارييا رەسسامەن بٸرگە نوبەل بەيبٸتشٸلٸك سىيلىعىن العان. جۋرناليستەرگە بۇل سىيلىق "دەموكراتييا مەن بەيبٸتشٸلٸكتٸڭ شارتى سانالاتىن پٸكٸر ەركٸندٸگٸن قورعاۋعا دەگەن تالپىنىسى" ٷشٸن بەرٸلدٸ. ناۋرىزدىڭ سوڭىندا مۋراتوۆ ٶزٸنە بەرٸلگەن نوبەل مەدالٸن اۋكتسيونعا قويىپ, تٷسكەن اقشانى ۋكراين بوسقىندارىنا اۋداراتىنىن ايتقان. ول تاراپتاردى اتىستى توقتاتىپ, تۇتقىن الماسىپ, قازا تاپقانداردىڭ مەيٸتٸن قايتارۋعا, گۋمانيتارلىق دەلٸز اشۋعا شاقىرعان.
وسىنىڭ الدىندا "نوۆايا گازەتا" باسىلىمى جۇمىسىن "ۋكراينا اۋماعىنداعى ارنايى وپەراتسييا اياقتالعانشا" توقتاتا تۇراتىنىن مەلٸمدەگەن. وعان دەيٸن باسىلىم روسكومنادزوردان ەكٸنشٸ رەت ەسكەرتۋ العان. سودان كەيٸن بيلٸك گازەتتٸڭ ليتسەنزيياسىن تارتىپ الۋى مٷمكٸن ەدٸ.
اقپان سوڭىندا رەسەي ۋكرايناعا باسىپ كٸرگەننەن كەيٸن "نوۆايا گازەتا" كرەملگە باعىنىشتى ەمەس بۇقارالىق اقپارات قۇرالدارى ٸشٸندە رەسەيدە قالىپ, بۇعاتتاۋدان امان قالىپ كەلگەن ساناۋلى باسىلىمنىڭ بٸرٸ ەدٸ. باسىلىم بيلٸك تالابىنا كٶنٸپ, "سوعىس" سٶزٸنٸڭ ورنىنا "ارنايى وپەراتسييا" سٶزٸن قولدانىپ كەلدٸ. بٸراق گازەت ۋكرايناداعى جاعداي تۋرالى جازبادى.
