نازىم قاحارمان بۇرىنعى كٷيەۋٸ, سوتتالعان ەكس-مينيستر قۋاندىق بيشٸمباەۆتىڭ اناسى الميرا نۇرلىبەكوۆانىڭ ٶزٸنە قاتىستى 25 ميلليون تەڭگەگە جۋىق سوما ٶندٸرۋ تۋرالى تالاپ ارىز بەرگەنٸن مەلٸمدەدٸ, دەپ حابارلايدى ult.kz.
ونىڭ ايتۋىنشا, بۇل – بيشٸمباەۆتار وتباسىنىڭ سوڭعى ەكٸ جىل ٸشٸندە ٶزٸنە قارسى جولداعان تٶرتٸنشٸ تالاپ ارىزى. ال بۇرىنعى ەنەسٸ تاراپىنان بەرٸلگەن العاشقى تالاپ وسى ەكەن.
قاحارماننىڭ سٶزٸنشە, داۋ ونىڭ ەكٸنشٸ بالاسى دٷنيەگە كەلگەننەن كەيٸن سەنٸمگەرلٸك باسقارۋعا العان فيتنەس-كلۋبقا بايلانىستى تۋىنداعان. ايتۋىنشا, كلۋب ورنالاسقان عيمارات الميرا نۇرلىبەكوۆانىڭ اتىنا رەسٸمدەلگەن, ال ٶزٸ بيزنەستٸ سەنٸمگەرلٸك باسقارۋ شارتى نەگٸزٸندە جٷرگٸزگەن.
«ول كەزدە ٶزٸمدٸ جاقسى وتباسىعا كەلدٸم دەپ ويلادىم. كەيٸن سەنٸمگەرلٸك باسقارۋ شارتىنىڭ وسىنداي داۋعا نەگٸز بولۋى مٷمكٸن ەكەنٸن تٷسٸندٸم. ەندٸ بٸرنەشە جىلدان كەيٸن وسى بيزنەس ارقىلى تٷسكەن قاراجاتتى قايتارۋدى تالاپ ەتٸپ وتىر», – دەدٸ ول.
سونداي-اق قاحارمان بۇل جاعدايدان كەيٸن ٶزٸ دە سوتقا جٷگٸنۋدٸ جوسپارلاپ وتىرعانىن ايتتى. ونىڭ سٶزٸنشە, بۇرىنعى جۇبايىنان اليمەنت تولىق كٶلەمدە تٶلەنبەگەن, سوندىقتان ول اليمەنت ٶندٸرۋ تۋرالى تالاپ قويۋدى كٶزدەپ وتىر.
