نۇرسۇلتان نازارباەۆ مەملەكەتتٸك قىزمەت ٸستەرٸ جەنە سىبايلاس جەمقورلىققا قارسى ٸس-قيمىل اگەنتتٸگٸنٸڭ تٶراعاسى اليك شپەكباەۆتى قابىلدادى, - دەپ حابارلايدى "ۇلت اقپارات" اقورداعا سٸلتەمە جاساپ.
كەزدەسۋ بارىسىندا ەلباسىعا اگەنتتٸكتٸڭ مەملەكەتتٸك قىزمەت سالاسىنداعى اتقارعان جۇمىستارى مەن سىبايلاس جەمقورلىققا قارسى ٸس-قيمىل بويىنشا قولدانىلعان شارالار جٶنٸندە ەسەپ بەرٸلدٸ.
نۇرسۇلتان نازارباەۆقا فاكتورلى-باللدىق تٶلەم جٷيەسٸنٸڭ مەملەكەتتٸك قىزمەتكە ەنگٸزٸلۋٸ جٶنٸندەگٸ پيلوتتىق جوبانىڭ ٸسكە اسىرىلۋ بارىسى تۋرالى دا باياندالدى.
قازاقستان پرەزيدەنتٸ جەمقورلىققا قارسى كٷرەستٸڭ تيٸمدٸلٸگٸن ارتتىرۋدىڭ ماڭىزدىلىعىنا ەرەكشە نازار اۋدارىپ, تيٸستٸ الدىن الۋ شارالارىن جٷرگٸزۋ قاجەتتٸگٸن ايتتى.
"بارلىق سالادا جەمقورلىققا قارسى كٷرەس كٷشەيتٸلۋگە تيٸس. بٸرٸنشٸدەن, تيٸستٸ مونيتورينگ جٷرگٸزٸپ, مەملەكەتتٸك قىزمەت كٶرسەتۋدٸ تسيفرلىق فورماتقا كٶشٸرۋ جۇمىستارىن جالعاستىرۋ قاجەت. ەكٸنشٸدەن, مەملەكەتتٸك قىزمەتشٸلەردٸڭ جالاقىسى جٶنٸندەگٸ مەسەلەنٸ شەشۋ كەرەك. ٷشٸنشٸدەن, باسشىلىقتىڭ جاۋاپكەرشٸلٸگٸن ارتتىرۋ ماڭىزدى", - دەدٸ مەملەكەت باسشىسى.
كەزدەسۋ بارىسىندا اليك شپەكباەۆ جەمقورلىققا قارسى ساياساتتى جٷزەگە اسىرۋ جولىندا قولدانىلىپ جاتقان شارالار مەن ونى حالىقارالىق ساراپشىلار قوعامداستىعىنىڭ باعالاۋ نەتيجەلەرٸ تۋرالى مەلٸمەت بەردٸ.
كەزدەسۋ قورىتىندىسى بويىنشا نۇرسۇلتان نازارباەۆ بٸرقاتار ناقتى تاپسىرما بەردٸ.
.jpeg)