«نازار اۋدارىڭىز – بالالار!» ٸس-شاراسى بارىسىندا ەرەجە بۇزۋدىڭ 16 مىڭنان استام فاكتٸسٸ انىقتالدى. بۇل تۋرالى قر ٸشكٸ ٸستەر مينيسترلٸگٸنٸڭ رەسمي ٶكٸلٸ نۇردٸلدە وراز مەلٸم ەتتٸ, دەپ حابارلايدى قازاقپارات.
«مەكتەپ دەمالىسى قارساڭىندا, ٶتكەن اپتادا ەلٸمٸزدە «نازار اۋدارىڭىز – بالالار!» اتتى الدىن الۋ ٸس-شاراسى ٶتتٸ. بۇل اكتسييانىڭ ماقساتى – بالالاردىڭ قاتىسۋىمەن بولاتىن جول-كٶلٸك وقيعالارىنىڭ الدىن الۋ. اتالعان ٸس-شارانىڭ العاشقى ٷش كٷنٸندە جول قوزعالىسى ەرەجەلەرٸن بۇزۋدىڭ 16 مىڭنان استام جاعدايى تٸركەلدٸ. ونىڭ ٸشٸندە: 1 223 فاكتٸ جول قيىلىستارىنان ٶتۋ ەرەجەلەرٸن, 1 415 فاكتٸ جاياۋ جٷرگٸنشٸلەر ٶتكەلٸنەن ٶتۋ ەرەجەلەرٸن بۇزۋ. بالالاردى تاسىمالداۋ ەرەجەلەرٸن بۇزۋعا قاتىستى 1 348 فاكتٸ ەسەپكە الىندى», - دەدٸ ول ٸشكٸ ٸستەر مينيسترلٸگٸندە ٶتكەن باسپاسٶز مەسليحاتى بارىسىندا.
سونىمەن قاتار رەسمي ٶكٸل پوليتسييا قىزمەتكەرلەرٸ جول جەنە كوممۋنالدىق قىزمەت ٶكٸلدەرٸمەن بٸرلەسٸپ, جالپى بٸلٸم بەرۋ مەكەمەلەرٸنە ٸرگەلەس جاتقان اۋماقتارعا جاياۋ جٷرگٸنشٸلەر ٶتكەلدەرٸن جول بەلگٸلەرٸمەن, ارنايى تاڭبالارمەن, قورشاۋلارمەن جەنە جول قوزعالىسىن رەتتەۋدٸڭ باسقا دا تەحنيكالىق قۇرالدارىمەن جابدىقتاۋ بويىنشا 4 مىڭنان استام تەكسەرۋ جٷرگٸزگەنٸن ايتتى.
«تەكسەرۋ نەتيجەلەرٸ بويىنشا ۋەكٸلەتتٸ ۇيىمدارعا كەمشٸلٸكتەردٸ جويۋ بويىنشا 1 704 نۇسقاما بەرٸلدٸ», - دەدٸ نۇردٸلدە وراز.
