ساۋدا جەنە ينتەگراتسييالار مينيسترٸ باقىت سۇلتانوۆ كارتوپ پەن سەبٸز باعاسىنا قاتىستى بولجامىن ايتتى, دەپ حابارلايدى "ۇلت اقپارات".
«سەبٸز مەسەلەسٸنە كەلسەك, كٶرشٸلەس ٶزبەكستاندا دا وسىنداي پروبلەما بولدى. شىن مەنٸندە, بٸزدە قالىپتاسقان باعانىڭ بٸر بٶلٸگٸ بٸزدٸڭ يمپورتتاۋىمىزدان پايدا بولدى, ٶيتكەنٸ كٶرشٸ ٶزبەكستان دا, كٶرشٸ رەسەي فەدەراتسيياسى دا سۇرانىس تۋدىردى. قازٸرگٸ ۋاقىتتا كارتوپتىڭ باعاسى ٶزگەرگەنٸن جەنە ارزانداپ جاتقانىن كٶرٸپ وتىرمىز. كٷزدە دە ايتارلىقتاي بەرنەشە ەسەگە تٶمەندەيدٸ دەپ كٷتەمٸز», - دەدٸ ساۋدا مينيسترٸ ورتالىق كوممۋنيكاتسييالار قىزمەتٸندە ٶتكەن باسپاسٶز مەسليحاتىندا.
ونىڭ ايتۋىنشا, سەبٸز بويىنشا دا وسىنداي جاعداي بايقالادى.
«بٸراق بيىل سەبٸز بويىنشا ٶنٸم جەتٸسپەۋشٸلٸگٸ بارلىق جەردە بايقالادى, وعان ەگٸس القاپتارىنىڭ قىسقارۋى سەبەپ بولدى», - دەپ تولىقتىردى باقىت سۇلتانوۆ.
ايتا كەتەيٸك, قازاقستاندا ماۋسىمارالىق كەزەڭدە كارتوپ پەن سەبٸز باعاسى شارىقتاپ كەتتٸ. كارتوپتىڭ "وتانى" سانالاتىن سولتٷستٸك قازاقستاندا بۇل ٶنٸمنٸڭ بٸر كەلٸسٸ 500 تەڭگەگە جەتكەن بولاتىن. سقو ەكٸمٸ قۇمار اقساقالوۆ شارۋالار ٶز شىعىندارىن اقتاۋ ٷشٸن بٸراز ٶنٸمٸن سىرتقا ساتىپ جٸبەرگەندٸكتەن, كارتوپ قىمباتشىلىعى تۋىنداعانىن تٷسٸندٸرگەن ەدٸ.
كەيبٸر ٶڭٸرلەردە سەبٸزدٸڭ بٸر كەلٸسٸ 700-800 تەڭگەگە دە جەتكەن.
