قر دەنساۋلىق ساقتاۋ مينيسترٸ الەكسەي تسوي اۋرۋحانادا ەمدەلٸپ جاتقان ناۋقاستارعا دەرٸ-دەرمەك جەتپەي جاتقانى تۋرالى ەلەۋمەتتٸك جەلٸدە تاراعان ۆيدەوعا قاتىستى جاۋاپ بەردٸ, دەپ حابارلايدى "ۇلت اقپارات".
«دوستار, Facebook-تەن ايدا بوقاەۆانىڭ ٷندەۋٸن كٶردٸم. ەلەۋمەتتٸك جەلٸ قولدانۋشىلارى ونىڭ بايلانىس نٶمٸرٸن بەردٸ. وعان حابارلاستىم», - دەپ جازدى دەنساۋلىق ساقتاۋ مينيسترٸ Facebook-تەگٸ پاراقشاسىندا.
ونىڭ ايتۋىنشا, ايدا بوقاەۆا بٸرنەشە اي بويى قوعامدىق باستامالارعا قاتىسىپ, اۋرۋحاناداعى دەرٸگەرلەرگە كٶمەكتەسٸپ, ناۋقاستارعا قامقور بولىپ, ەدەن جۋىپ, سۋسىن ەكەلەدٸ.
«ول اۋرۋحانادا دەرٸگەرلەر قالاي ەرلٸكپەن جۇمىس ٸستەپ جٷرگەنٸن, سوناي-اق جۇمىس بارىسىندا كەزدەسەتٸن مەسەلەلەر تۋرالى دا ايتتى. مۇندايعا بەي-جاي قارامايتىن ادامدار ماعان حالىققا جاعداي قالاي بولىپ جاتقانىن كٶرسەتۋ, ەمدەۋ بويىنشا ۇسىنىمدار جەنە دۇرىستاپ كٶمەك كٶرسەتۋ تۋرالى ٶتٸنٸشتەرٸن ايتادى. بٸز مەديتسينالىق مەكەمە ٸشٸندە نە بولىپ جاتقانىن قارايتىن ادامداردان حالىقتىق باقىلاۋ قۇرامىز دەپ كەلٸستٸك. بۇل جاعداي قالاي بولىپ جاتقانىن باعالاۋ ٷشٸن, قالاي كٶمەكتەسۋگە بولاتىنى تۋرالى ۇسىنىم جاساۋ, دەرٸ-دەرمەك جەتكٸلٸكتٸ مە ەكەنٸن باقىلاۋ, ناۋقاستارعا قالاي قىزمەت كٶرسەتٸلەتٸنٸن قاراۋ, باسشىلىق ۇجىم مەن ناۋقاستارعا قالاي كٶڭٸل بٶلەتٸنٸن باقىلاۋ ٷشٸن قاجەت», - دەيدٸ الەكسەي تسوي.
سونداي-اق, ول قاجەت بولعان جاعدايدا, ەسٸرەسە جەمقورلىق جەنە قايتا ساتۋ سيپاتتى جاعدايلار بويىنشا قاتاڭ شارالار قولداناتىنىن جەتكٸزدٸ.
«ايدا بۇل جۇمىستى ٶز قولىنا الىپ, ايماقتاردى ارالاۋعا ەزٸر ەكەنٸن بٸلدٸردٸ. بٸز ايماقتار بويىنشا وسىنداي جۇمىسقا ٶز ەركٸمەن قاتىسۋعا دايىن مەيٸرٸمدٸ جانداردى ٸزدەيمٸز. ۇلتتىق ۆولونتەرلەر جٷيەسٸ وسى جوباعا قاتىسۋعا نيەت بٸلدٸردٸ. مەديتسينالىق مەكەمەلەرگە كٸرۋدٸ بٸز قامتاماسىز ەتەمٸز. سوڭىندا جاعدايدى جاقسارتۋ بويىنشا ناقتى شەشٸم قابىلدايمىز.
قازٸرگٸ ۋاقىتتا قوعام جاعدايدى تۇراقتاندىرۋ ٷشٸن باس بٸرٸكتٸردٸ جەنە بۇل ٷلكەن ٷمٸت وياتادى», - دەيدٸ ول.
