فوتو: اشىق دەرەككٶز
شىمكەنتتە 11-سىنىپ وقۋشىسى ٷيٸن تازالاۋعا كەلگەن ەيەل ادامدى ٶلتٸرٸپ, دەنەسٸن قوقىس جەشٸگٸنٸڭ جانىنا تاستاپ كەتكەن. سونىمەن قاتار وقۋشى مەيٸتتٸ زورلادى دەگەن كٷدٸككە دە ٸلٸنٸپ وتىر, دەپ حابارلايدى Ult.kz Otyrar.kz-كە سٸلتەمە جاساپ.
پروكۋروردىڭ ايتۋىنشا, مەكتەپ وقۋشىسى شىمكەنتكە بيىل شٸلدە ايىندا قۇرىلىستا جۇمىس ٸستەۋگە كەلگەن. 21 شٸلدە كٷنٸ جالدامالى پەتەردە جالعىز قالعان. جىنىستىق قاتىناسقا تٷسكٸسٸ كەلٸپ, ۇيالى تەلەفونىمەن Telegram جەلٸسٸنە كٸرگەن. وندا «شىمكەنت جۇمىس» اتتى جالپى توپقا «تۇرعىن ٷيگە تازالىق جاسايتىن قىزدار كەرەك» دەگەن حابارلاما جازعان.
جەبٸرلەنۋشٸ ديانا وڭعارباەۆا كٷن كٶرۋ ٷشٸن ٷي تازالاۋمەن اينالىسقان. حابارلاما ارقىلى كەلٸپ, ٷي تازالاپ, وقۋشىدان 15 مىڭ تەڭگە ەڭبەكاقىسىن سۇراعان. ول اقىسىن اناسى بەرەتٸنٸن ايتىپ سىلتاۋراتقان.
«ٷيدەن سابى اعاشتان جاسالعان اسٷي پىشاعىن الىپ, جەبٸرلەنۋشٸ وڭعارباەۆانىڭ تەرٸس قاراپ تۇرعانىن پايدالانعان. ٶزٸنٸڭ ادام ٶلتٸرۋ تۋرالى قىلمىستىق ويىن سوڭىنا دەيٸن جەتكٸزۋ ٷشٸن پىشاعىمەن مارقۇمنىڭ ارتقى مويىن تۇسىنان توقتاۋسىز 10 رەت سۇعىپ العان. ارى قاراي مەكتەپ وقۋشىسى مارقۇمدى جەرگە جاتقىزىپ, بٷيرەك تۇسىنا بٸر رەت سۇعىپ العان», - دەيدٸ پروكۋرور.
جەبٸرلەنۋشٸ العان جاراقاتىنان وقيعا ورنىندا قازا تاپتى. 26 جاستاعى ديانا وڭعارباەۆانىڭ دەنەسٸ 10 كٷننەن كەيٸن شىمكەنتتەگٸ قوقىس جەشٸگٸنٸڭ جانىنان تابىلدى. پروكۋروردىڭ سٶزٸنشە مارقۇمدى ٶلتٸرٸپ قانا قويماي, ونىڭ مەيٸتٸمەن جىنىستىق قاتىناسقا تٷسكەن, ال ۇيالى تەلەفونىن ساتىپ جٸبەرگەن.
«مەن 28 شٸلدە كٷنٸ ارىز جازعانمىن. ال 29 كٷنٸ استاناعا جازدىم. سودان كەيٸن عانا 30 كٷنٸ تەلەفونى تابىلدى. ال 31 كٷنٸ قىزىم قوقىستان تابىلدى. پوليتسەيلەر قايدا جٷر, ٸزدەمەي?! دەل وسىلاي قورلانىپ ٶلمەيتٸن ەدٸ عوي», - دەپ مارقۇمنىڭ اناسى قارلىعاش وڭعارباەۆا جىلاپ جٸبەردٸ.
بەلگٸلٸ بولعانداي, مەكتەپ وقۋشىسى ٶزٸنە تاعىلعان ايىپپەن ٸشٸنارا عانا كەلٸسەتٸن كٶرٸنەدٸ. ايتۋىنشا, وقۋشى ادام ٶلتٸرگەنمەن, مەيٸتپەن جىنىستىق قاتىناسقا تٷسپەگەن. ال ساراپتاما قورىتىندىسىنا ساي, مەيٸتتەن دنق تابىلماعان كٶرٸنەدٸ. الايدا, ديانا وڭعارباەۆانىڭ تۋىستارى ونىمەن كەلٸسپەيدٸ.
«مەنٸڭ تالابىم – بالانى ٶمٸرباقي سوتتاۋ. ول مەيٸتتٸ زورلاعانىن مويىنداماي وتىر. ال العاشقىدا قولعا تٷسكەن كەزدە وسى قىلمىسىن مويىنداعان بولاتىن. قولىنداعى پىشاعىن 26 جەرگە تىققان», - دەيدٸ مارقۇمنىڭ اناسى.
