قازاقستان پارلامەنتٸ سەناتىنىڭ تٶراعاسى بولعان مەۋلەن ەشٸمباەۆ شەيح زايد اتىنداعى «ادامزات باۋىرلاستىعى ٷشٸن» حالىقارالىق سىيلىعىنىڭ 2027 جىلعى لاۋرەاتتارىن انىقتايتىن قازىلار القاسىنىڭ قۇرامىنا ەنگەنٸن ايتتى, دەپ حابارلايدى ult.kz.
بۇل تۋرالى مەۋلەن ەشٸمباەۆ ەلەۋمەتتٸك پاراقشاسىندا حابارلادى.
ەشٸمباەۆتىڭ ايتۋىنشا, قازىلار القاسىنا ونى ەل-ازھاردىڭ باس يمامى احمەد ات-تايەبتٸڭ ۇسىنىسىمەن ەنگٸزگەن.
«2027 جىلعى لاۋرەاتتاردى انىقتاۋ جٶنٸندەگٸ قازىلار القاسىنىڭ قۇرامىنا ەنگەنٸم مەن ٷشٸن ٷلكەن مەرتەبە», – دەپ جازدى سەنات تٶراعاسى.
ونىڭ مەلٸمەتٸنشە, قازىلار القاسىنىڭ قۇرامىنا پورتۋگالييانىڭ بۇرىنعى پرەزيدەنتٸ مارسەلۋ رەبەلۋ دە سوۋزا, بۇۇ-نىڭ بوسقىندار ٸسٸ جٶنٸندەگٸ بۇرىنعى جوعارعى كوميسسارى, يراكتىڭ بۇرىنعى پرەزيدەنتٸ بارحام سالەح, ليۆاننىڭ بٸرٸنشٸ حانىمى نەحمات اۋن جەنە پاپا كەڭەسٸنٸڭ مەدەنيەت جٶنٸندەگٸ بۇرىنعى تٶراعاسى كاردينال دجانفرانكو راۆازي كٸرگەن.
شەيح زايد اتىنداعى «ادامزات باۋىرلاستىعى ٷشٸن» سىيلىعى مەدەنيەتتەر مەن دٸندەر اراسىنداعى ديالوگتى, بەيبٸتشٸلٸك پەن ٶزارا تٷسٸنٸستٸكتٸ دامىتۋعا ٷلەس قوسقان ادامدار مەن ۇيىمدارعا بەرٸلەدٸ.
ەشٸمباەۆ بۇل جۇمىستى قازاقستاننىڭ مەدەنيەتارالىق جەنە دٸنارالىق ديالوگ سالاسىندا جيناقتاعان تەجٸريبەسٸن حالىقارالىق دەڭگەيدە تانىستىرۋعا مٷمكٸندٸك بەرەتٸنٸن اتاپ ٶتتٸ.
«قازىلار القاسىنىڭ قۇرامىنداعى جۇمىس بەيبٸتشٸلٸك پەن ٶزارا تٷسٸنٸستٸك قۇندىلىقتارىن ٸلگەرٸلەتۋگە, سونداي-اق قازاقستاننىڭ مەدەنيەتارالىق جەنە دٸنارالىق ديالوگ سالاسىندا جيناقتاعان تەجٸريبەسٸن تانىستىرۋعا ٷلەس قوسۋعا مٷمكٸندٸك بەرەدٸ دەپ سەنەمٸن», – دەدٸ ول.
