مەسكەۋدە داۋىلدان قيسايعان باعدارشام باعانى. 29 مامىر 2017 جىل.
مەسكەۋ مەن ونىڭ تٶڭٸرەگٸندە 29 مامىردا تۇرعان داۋىل سالدارىنان قازا تاپقاندار سانى 16 ادامعا جەتتٸ, دەپ حابارلادى جەرگٸلٸكتٸ بيلٸك. رەسەي تەرگەۋ كوميتەتٸنٸڭ رەسمي ٶكٸلٸ سۆەتلانا پەترەنكو بۇعان دەيٸن داۋىلدان مەسكەۋدە 11 ادام قۇربان بولعانىن ايتقان.
ال, مەسكەۋ وبلىسىنىڭ گۋبەرناتورى اندرەي ۆوروبەۆ وبلىس تەرريتوريياسىندا بەس ادام, ونىڭ ٸشٸندە بٸر بالا قازا تاپقانىن حابارلادى.
29 مامىر كٷنٸ كەشكە كەنەتتەن تۇرعان داۋىلدان اعاشتار قۇلاپ, ەلەكتر قۋاتىن تاراتۋ جەلٸلەرٸ ٷزٸلگەن.
مەسكەۋدٸڭ دەنساۋلىق ساقتاۋ دەپارتامەنتٸنٸڭ جەتەكشٸسٸ الەكسەي حريپۋن بٷگٸن 168 ادام دەرٸگەرلٸك كٶمەك كۇراپ جٷگٸنگەنٸن حابارلادى. ونىڭ سٶزٸنشە, زارداپ شەككەن 108 ادام, ونىڭ ٸشٸندە 22 بالا اۋرۋحانادا جاتىر. سەگٸز ادامنىڭ جاعدايى "اۋىر" دەپ باعالانىپ وتىر.
بۇعان دەيٸن رەسەي ەنەرگەتيكا مينيسترلٸگٸ مەسكەۋدە داۋىل سالدارىنان 7300 ٷي ەلەكتر قۋاتىنسىز قالعانىن حابارلاعان.
مەسكەۋ مەرٸ سەرگەي سوبيانيننٸڭ سٶزٸنشە, جىلدامدىعى ساعاتىنا 110 كيلومەترگە جەتكەن جەلدەن 3500-دەن استام اعاش تامىرىمەن قوپارىلىپ, قۇلاعان.
