ماڭعىستاۋدا بٸرنەشە كٷننەن بەرٸ وبلىستاعى گاز قۇيۋ بەكەتتەرٸنٸڭ بٸرٸندە سۇيىق وتىن بولماسا, ەندٸ بٸرٸندە ۇزىن-سونار كەزەك, دەپ حابارلايدى "ۇلت اقپارات".
جٷرگٸزۋشٸلەر ساعاتتاپ كەزەك كٷتكەنٸمەن ەندٸ جەتە بەرگەندە وتىن تاۋسىلىپ قالادى. دەمالىس كٷندەرٸ حالىقتى سەرگەلدەڭگە سالعان گاز مەسەلەسٸ بٷگٸندە دە كٷن تەرتٸبٸنەن تٷسكەن جوق.
سۇيىق وتىننىڭ تاپشىلىعىنا بايلانىستى ماڭعىستاۋ وبلىسى ەكٸمدٸگٸنٸڭ باسپاسٶز قىزمەتٸ رەسمي اقپارات تاراتتى.
«جالپى, ماڭعىستاۋ وبلىسىنىڭ سۇيىتىلعان مۇناي گازىنا اي سايىنعى سۇرانىسى 19 مىڭ توننا. ونىڭ 14 500 تونناسى «قازاق گاز ٶڭدەۋ» زاۋىتىنان جٸبەرٸلەدٸ. قالعانى اتىراۋ مۇناي ٶڭدەۋ زاۋىتىنان جەتكٸزٸلۋٸ تيٸس ەدٸ. اتالعان زاۋىت ناۋرىزدىڭ سوڭىنا دەيٸن جٶندەۋ جۇمىستارىنا جابىلىپ, كٶلٸك وتىنىنىڭ ماڭعىستاۋعا تاسىمالدانۋى ۋاقىتشا توقتاتىلدى. وسىعان وراي ەلٸمٸزدٸڭ ەنەرگەتيكا مينيسترلٸگٸ «سنپس-اقتٶبەمۇنايگاز» اق-نان قوسىمشا 504 توننا سۇيىتىلعان گاز بٶلدٸ. بۇل سۇيىتىلعان گاز الداعى 2-3 كٷندە ٶڭٸرگە كەلەدٸ»,- دەلٸنگەن باسپاسٶز حابارلاماسىندا.
قاجەتتٸلٸكتٸ ٶتەپ, قالىپتاسقان مەسەلەنٸ شەشۋ ٷشٸن وبلىس ەكٸمٸ شۇعىل شەشٸم قابىلدادى. «قازاق گاز ٶڭدەۋ» زاۋىتىنان ناۋرىز ايىنىڭ سوڭعى كٷندەرٸ بەرٸلەتٸن گازدى بەرٸ جىلجىتىپ, بٷگٸن-ەرتەڭ گاز قۇيۋ بەكەتتەرٸنە جٸبەرٸلەدٸ. شەنەۋنٸكتەر بۇل مەسەلەنٸ تولىق شەشۋگە مٷمكٸندٸك بەرەتٸنٸنە سەنٸم بٸلدٸردٸ.
