قىزىلوردا وبلىسىندا اتىراۋدا ۆاحتالىق ەدٸسپەن جۇمىس ٸستەپ كەلگەن 3 ازاماتقا كوروناۆيرۋس ينفەكتسيياسى دياگنوزى قويىلدى, دەپ حابارلايدى "ۇلت اقپارات".
قازٸرگٸ تاڭدا وبلىستا كوروناۆيرۋس ينفەكتسيياسىن جۇقتىرعان 204 ادام بار.
ونىڭ ٸشٸندە 118 ادام سىرقاتىنان تولىق ايىعىپ شىقتى.
«اتىراۋدان كەشە ۆاحتالىق ەدٸسپەن جۇمىس ٸستەيتٸن 170 ادام كەلگەن بولاتىن. ولاردىڭ ٷشەۋٸنەن كوروناۆيرۋس ينفەكتسيياسى انىقتالدى. سونداي-اق, سوڭعى تەۋلٸكتە كٶپبەيٸندٸ قالالىق اۋرۋحانانىڭ 3 قىزمەتكەرٸ دە قاتەرلٸ ٸندەتتٸ جۇقتىرىپ الدى. ولاردىڭ ۆيرۋستى جۇقتىرعانى سكرينينگتٸك تەكسەرۋ بارىسىندا بەلگٸلٸ بولدى. قازٸرگٸ تاڭدا ناۋقاستاردىڭ جاعدايى بٸرقالىپتى, ەمدەرٸن الىپ جاتىر», – دەدٸ جاقسىلىق ەبٸلقاسىمۇلى.
سونداي-اق, كوروناۆيرۋس ينفەكتسيياسىن جۇقتىرعاندارمەن بايلانىستا بولعان 2966 ازامات انىقتالدى. ونىڭ ٸشٸندە, 1577-ٸ جاقىن قارىم-قاتىناستا, 1389-ى جاناما بايلانىستا بولعان.
