قىزىلوردا وبلىسىندا كوروناۆيرۋس ينفەكتسيياسى دياگنوزى قويىلعان سوڭعى سەگٸز ناۋقاستىڭ ونى قايدان جۇقتىرعانى بەلگٸلٸ بولدى, دەپ حابارلايدى "ۇلت اقپارات".
ولاردىڭ التاۋى سىردارييا اۋدانىنان تٸركەلسە, ەكەۋٸ قىزىلوردا قالاسىندا تۇرادى. جاس شاماسى بويىنشا ەڭ ٷلكەنٸ 1970 جىلى دٷنيەگە كەلگەن ەر ادام بولسا, ەڭ جاسى - 2002 جىلعى قىز بالا. بارلىعى بۇدان بۇرىن كوروناۆيرۋس ينفەكتسيياسىمەن اۋىرعان اداممەن قارىم-قاتىناستا بولعان.
«قازٸر وبلىستا اتالعان دياگنوز قويىلعان 100 ادام بار. اۋرۋ وشاقتارىندا دەزينفەكتسييالىق جۇمىستار جٷرگٸزٸلٸپ جاتىر. قارىم-قاتىناستا بولعان ادامدار انىقتالۋدا. بٷگٸنگٸ كٷنگە دەيٸن جٷرگٸزٸلگەن ەپيدزەرتتەۋ نەتيجەسٸ بويىنشا ناۋقاستارمەن بايلانىستا بولعان 1174 ازامات انىقتالدى. ونىڭ ٸشٸندە تىعىز قارىم-قاتىناستا بولعاندار سانى – 585, ىقتيمال قارىم-قاتىناستا بولعاندار سانى – 589 ادام. ستاتسيونارلاردا مەديتسينالىق باقىلاۋعا 545 ادام الىندى, ٷي جاعدايىنداعى باقىلاۋداعىلاردىڭ سانى – 629 ادام», - دەپ مەلٸم ەتتٸ قىزىلوردا وبلىسىنىڭ تاۋارلار مەن كٶرسەتٸلەتٸن قىزمەتتەردٸڭ ساپاسى مەن قاۋٸپسٸزدٸگٸن باقىلاۋ دەپارتامەنتٸ.
9 سەۋٸردەگٸ جاعداي بويىنشا ايماقتا كوروناۆيرۋس ينفەكتسيياسىنا شالدىققان 100 ادام انىقتالدى. ونىڭ ٸشٸندە قىزىلوردا قالاسىندا – 12 جاعداي تٸركەلسە, اۋداندار بويىنشا جاڭاقورعاندا - 16, قارماقشىدا – 4, شيەلٸدە – 52, سىردارييادا - 14, ارالدا – 2 جاعداي ورىن الدى.
بۇدان بۇرىن قىزىلوردا وبلىسىندا كوروناۆيرۋس جۇقتىرعان جٷكتٸ ەيەل امان-ەسەن بوسانعاندىعى حابارلاندى.
