2 اقپاندا قىتايدىڭ دەنساۋلىق ساقتاۋ سالاسى ماماندارى ۋحان قالاسىنان تاراعان كوروناۆيرۋستان كەمٸندە 304 ادامنىڭ كٶز جۇمعانىن حابارلادى. 14 380 ادام ۆيرۋستى جۇقتىرعان.
قىتايدان تىس اۋماقتا دا ۆيرۋس جىلدام تاراپ جاتىر. سوڭعى ەكٸ كٷندە رەسەي, ۇلىبريتانييا, شۆەتسييا العاشقى ۆيرۋستى جۇقتىرۋ وقيعاسىنىڭ تٸركەلگەنٸن حابارلادى. ۆيرۋستىڭ تارالۋىن توقتاتۋ ٷشٸن قىتايعا بارۋعا تىيىم سالعان مەملەكەتتەر قاتارى كٶبەيدٸ. اقش, اۆسترالييا سوڭعى ەكٸ اپتادا قىتايدا بولعان ازاماتتاردىڭ ەلگە كٸرۋٸنە تىيىم سالدى.
اقش-تىڭ دەنساۋلىق ساقتاۋ مينيسترٸ الەكس ازار جاقىندا قىتايدا بولعان "شەتەل ازاماتتارىنىڭ (اقش-تا جاقىندارى بار نەمەسە سوندا تۇراقتى تٸركەلگەن ازاماتتاردان باسقاسى) اقش-قا كٸرۋٸنە تىيىم سالىنادى" دەدٸ. اقش قورعانىس مينيسترٸ مارك ەسپەر كارانتين ورنى رەتٸندە ەسكەري بازالاردى پايدالانۋ تۋرالى دەنساۋلىق ساقتاۋ ماماندارىنىڭ ٶتٸنٸشٸن قابىلداعانىن راستادى.
دٷنيەجٷزٸلٸك دەنساۋلىق ساقتاۋ ۇيىمى 1 اقپاندا ەلەم ەلدەرٸن كوروناۆيرۋستىڭ جەرگٸلٸكتٸ اۋماقتا تارالۋىنا دايىن بولۋعا شاقىرعان.
سوڭعى دەرەك بويىنشا, كەمٸندە 25 مەملەكەتتەن كوروناۆيرۋس تابىلعان. ناۋقاستاردىڭ كٶبٸ جاقىندا قىتايدان كەلگەن نەمەسە قىتايدان كەلگەندەرمەن بايلانىستا بولعان ادامدار.
