قىرعىزستاندا سىنشىلار پارلامەنت ۇسىنعان جاڭا كونستيتۋتسييا جوباسى پرەزيدەنت ٶكٸلەتٸن كٷشەيتٸپ جٸبەرمەي مە دەپ قاۋٸپتەنەدٸ. ٶتكەن ايدا پارلامەنت سايلاۋىنان كەيٸن نارازىلىق تۇتانىپ, ٸزٸنشە پرەزيدەنت پەن ٷكٸمەت وتستاۆكاعا كەتكەن قىرعىزستاندا ساياسي داعدارىس تۋىنداعان.
پرەزيدەنت مٸندەتٸن اتقارعالى بەرٸ بيلٸكتٸ باسىپ الۋعا تىرىستى دەپ ايىپتالعان سادىر جاپاروۆ باستاماسىمەن جاسالعان كونستيتۋتسييا جوباسى 17 قاراشادا جارييالاندى. دەپۋتاتتاردىڭ 80 پايىزى قولداعان جوبا پرەزيدەنتتٸڭ ٶكٸلەتٸن كەڭەيتٸپ, اتقارۋ ورگاندارىندا حالىق قۇرىلتايى اتتى جاڭا ورگان قۇرۋدى قاراستىرادى. جوبا بويىنشا, وعان پارلامەنت پەن ٷكٸمەت ەسەپ بەرۋٸ تيٸس.
جوبادا بۇعان قوسا, پارلامەنتتەگٸ دەپۋتاتتار سانىن 120-دان 90-عا دەيٸن قىسقارتۋ ۇسىنىلعان. ٷكٸمەت تٸكەلەي پرەزيدەنت پەن پرەزيدەنت ەكٸمشٸلٸگٸنە قارايدى.
پرەزيدەنتتٸڭ رەسمي ٶكٸلٸ نۋرگازى اناركۋلوۆتىڭ ايتۋىنشا, جارييالانعان مەتٸن تاعى دا ٶزگەرۋٸ مٷمكٸن. ۇسىنىلعان ٶزگەرٸستەردٸ قولداپ سٶيلەگەن اناركۋلوۆ قىرعىزستانعا “كٶشباسشى” قاجەت دەپ مەلٸمدەگەن.
الايدا بۇرىنعى پرەمەر-مينيستر فەليكس كۋلوۆ ازات ەۋروپا/ازاتتىق تٸلشٸسٸنە بەرگەن سۇحباتىندا جوبانى سىناپ, ۇسىنىستىڭ نەگٸزگٸ ماقساتى “پرەزيدەنتتٸڭ ابسوليۋت بيلٸگٸن” قالىپتاستىرۋ دەپ اتاپ كٶرسەتكەن.
