«بارىس» بٷگٸن قۇرلىقتىق حوككەي ليگاسىنداعى كەزەكتٸ ويىنىن ەلوردادا بەلارۋستٸڭ «دينامو» (مينسك) كومانداسىنا قارسى ٶتكٸزدٸ, دەپ حابارلايدى قازاقپارات.
قازاقستاندىق حوككەيشٸلەر ەكٸ كوماندا اراسىنداعى سوڭعى ٷش كەزدەسۋدە قارسىلاستارىنا ەسە جٸبەرٸپ قويعان بولاتىن. سوندىقتان «بارىس» سول كەتكەن ەسەنٸ قايتارۋعا تىرىستى. وعان قوسا بيىل ەلوردالىق كلۋب پلەي-وفف ساتىسىنا شىعۋ ٷشٸن كٷش سالاتىنى بەلگٸلٸ ەدٸ.
كەزدەسۋدٸ ايدىن يەلەرٸ بەلسەندٸ باستادى. نەتيجەسٸندە 5-مينۋتتا ليندەن ۆەي «بارىستى» العا شىعاردى. ودان كەيٸن قازاقستاندىق كلۋب ٶز قاقپاسىنا ەكٸ شايبا جٸبەرٸپ الدى. «دينامو» ساپىنان سەرگەي ساپەگو 9, تايلەر گراوۆاتس 15-مينۋتتاردا مەرگەندٸگٸمەن كٶزگە تٷستٸ.
ەكٸنشٸ كەزەڭدە «بارىس» باسىمدىعىن ارتتىردى. وسىنداي سەتتەردٸڭ بٸرٸندە كەرتيس ۆولك سوققان شايبانى تٶرەشٸلەر ەسەپكە العان جوق. وعان بايلانىستى ەرەگە سەيكەس سوعىلعان جوق دەگەن شەشٸم شىعاردى. ال 36-مينۋتتا نيكيتا ميحايليس كٶزدەگەن نىسانادان مٷلت كەتكەن جوق.
نەگٸزگٸ كەزەڭ كوماندالار 2:2 ەسەبٸمەن تەڭ تٷسٸپ, ويىن وۆەرتايمعا ۇلاستى. وۆەرتايمدا جەڭٸمپاز انىقتالعان جوق. بۋلليتتە «بارىس» باسىم تٷستٸ.
ەندٸ «بارىس» 25 قاراشادا ەلوردادا رەسەيدٸڭ «تورپەدو» (نيجنيي نوۆگورود) كومانداسىمەن ٶتكٸزەدٸ.
