بٷگٸن فۋتبولدان پرەمەر-ليگا كوماندالارى اراسىنداعى ەل بٸرٸنشٸلٸگٸنٸڭ ون جەتٸنشٸ تۋرى باستالدى, دەپ حابارلايدى "ۇلت اقپارات".
العاشقى ويىندا ەلوردادا «استانا» شىمكەنتتٸڭ «ورداباسى» كلۋبىمەن شەبەرلٸك بايقاستى.
كەزدەسۋ بارىسىندا شىمكەنتتٸك كلۋب بٸرٸنشٸ كەزەڭنٸڭ ٶزٸندە الاڭ يەلەرٸ قاقپاسىنا ەكٸ گول سوعىپ ٷلگەردٸ. الدىمەن 21-مينۋتتا باعدات قايىروۆ «استانا» قاقپاشىسىن قاپى قالدىرسا, ودان كەيٸن 24-مينۋتتا جواو پاولو ەسەپتٸ ٷستەمەلەي تٷستٸ.
ەكٸنشٸ كەزەڭدە تٸزگٸندٸ ەلوردالىق كوماندا ٶز قولىنا الۋعا تىرىستى. دەسە دە ولارعا سەتتٸلٸك جەتٸسپەي جاتتى. كەزدەسۋدە «استانا» قارسىلاسىنا 0:2 ەسەبٸمەن ەسە جٸبەردٸ.
ەسكە سالساق, بٷگٸن اتالعان تۋردا تاعى ەكٸ ويىن ٶتكٸزٸلەدٸ. دەل قازٸر ورالدا «اقجايىق» پەن قاراعاندىنىڭ «شاحتەر» اراسىنداعى كەزدەسۋدٸڭ ەكٸنشٸ, «اقتٶبە» مەن «قىزىلجار» ويىنىنىڭ بٸرٸنشٸ كەزەڭٸ ٶتۋدە. ەزٸرگە ەسەپ 0:0.
ال 23 ماۋسىمدا 18.00-دە «جەتٸسۋ» (تالدىقورعان) مەن «اتىراۋ», 19.00-دە «قايرات» (الماتى) پەن «كاسپيي» (اقتاۋ), 20.00-دە «تاراز» بەن «تۇران» (تٷركٸستان) ويىندارى بولادى. بۇل تۋردى 21.00-دە «قايسار» (قىزىلوردا) مەن «توبىل» (قوستاناي) كەزدەسۋٸ تٷيٸندەيدٸ.
