فۋتبولدان پرەمەر-ليگا كوماندالارى اراسىنداعى ەل بٸرٸنشٸلٸگٸنٸڭ ون التىنشى تۋرىنىڭ العاشقى ويىن كٷنٸ اياقتالدى, دەپ حابارلايدى "ۇلت اقپارات".
بۇدان بۇرىن ورالدىڭ «اقجايىعى» سىرت الاڭدا پەتروپاۆلدىڭ «قىزىلجارىنان» 1:0 ەسەبٸمەن باسىم تٷسكەنٸن حابارلاعان ەدٸك.
ودان كەيٸنگٸ كەزدەسۋدە قاراعاندىنىڭ «شاحتەرٸ» «تاراز» كومانداسىن قابىلدادى. ويىن تاعدىرىن شەشكەن جالعىز گولدى قاراعاندىلىق الان چوچيەۆ 21-مينۋتتا ٶز ەنشٸسٸنە جازدى. وسىلايشا «شاحتەر» جەتٸ ويىنعا سوزىلعان سەتسٸزدٸكتەر سەريياسىن توقتاتىپ, قارسىلاسىنان 1:0 ەسەبٸمەن باسىم تٷستٸ.
ەلوردالىق «استانا» سىرت الاڭدا «اتىراۋدى» 2:0 ەسەبٸمەن تٸزە بٷكتٸردٸ. ەكٸ گولدى دا مارين توماسوۆ سوقتى. نەتيجەسٸندە ول بيىلعى بٸرٸنشٸلٸكتە سوققان گولىنىڭ سانىن 11-گە جەتكٸزدٸ.
ال شىمكەنتتٸڭ «ورداباسى» كلۋبى ٶز الاڭىندا «اقتٶبەگە» 0:1 ەسەبٸمەن جول بەردٸ. كەزدەسۋ تاعدىرىن شەشكەن, 80-مينۋتتا سوعىلعان گولدىڭ اۆتورى - يۋريي لوگۆينەنكو.
اتالعان تۋرداعى قالعان ٷش ويىن 19 ماۋسىمدا ٶتكٸزٸلەدٸ. بۇل كٷنٸ «توبىل» (قوستاناي) مەن «جەتٸسۋ» (تالدىقورعان), «كاسپيي» (اقتاۋ) مەن «قايسار» (قىزىلوردا), «تۇران» (تٷركٸستان) مەن «قايرات» (الماتى) كەزدەسەدٸ.
