بٷگٸن فۋتبولدان پرەمەر-ليگا كوماندالارى اراسىنداعى ەل بٸرٸنشٸلٸگٸنٸڭ ون سەگٸزٸنشٸ تۋرىندا ەكٸ ويىننىڭ نەتيجەسٸ بەلگٸلٸ بولدى, دەپ حابارلايدى "ۇلت اقپارات".
العاشقى كەزدەسۋدە پەتروپاۆلدا «قىزىلجار» مەن ەلوردالىق «استانا» شەبەرلٸك بايقاستى. ويىن بارىسىندا الاڭ يەلەرٸ جيناقى قيمىل كٶرسەتتٸ. ولاردىڭ قاتارىنان ماكسيم دراچەنكو 3, يۋريي بۋشمان 9-مينۋتتاردا مەرگەندٸك تانىتتى. ال 51-مينۋتتا ەلوردالىق يسلامبەك قۋات ەسەپ ايىرماسىن قىسقارتتى. ودان كەيٸن 68-مينۋتتا پەتروپاۆلدىق كوماندادان داركو زوريچ قايتادان «قىزىلجاردىڭ» باسىمدىعىن ارتتىردى. ەلوردالىق شابۋىلشى ابات ايىمبەتوۆ 86-مينۋتتا گول سوعىپ, كومانداسىنا ٷمٸت سىيلاعان ەدٸ.
كەزدەسۋدە «قىزىلجار» قارسىلاسىن 3:2 ەسەبٸمەن تٸزە بٷكتٸردٸ. بۇل - «استانانىڭ» قاتارىنان ەكٸنشٸ جەڭٸلٸسٸ.
تاعى بٸر كەزدەسۋدە قاراعاندىنىڭ «شاحتەرٸ» ٶز الاڭىندا «اقتٶبەدەن» 1:0 ەسەبٸمەن باسىم تٷستٸ. كەزدەسۋ تاعدىرىن 68-مينۋتتا قاراعاندىلىق جان-ەلي پايرۋز سوققان جالعىز گول شەشتٸ.
سونداي-اق, بٷگٸن اتالعان تۋردا شىمكەنتتٸڭ «ورداباسى» كلۋبى ٶز الاڭىندا تالدىقورعاننىڭ «جەتٸسۋىن» قابىلدايدى.
قالعان تٶرت ويىن ەرتەڭ, 28 ماۋسىمدا ٶتكٸزٸلەدٸ. بۇل كٷنٸ «اقجايىق» پەن «تاراز», «توبىل» مەن «قايرات», «كاسپيي» مەن «تۇران», «اتىراۋ» مەن «قايسار» جاسىل الاڭعا شىعادى.
