قوستاناي وبلىسى پوليتسييا دەپارتامەنتٸنٸڭ مۇراجايىندا قۋعىن-سٷرگٸن قۇرباندارىن ەسكە الۋ كٷنٸنە وراي ەكسكۋرسييا ٶتۋدە, دەپ حابارلايدى "ۇلت اقپارات" ۆەدومستۆونىڭ باسپاسٶز قىزمەتٸنە سٸلتەمە جاساپ.
قوستاناي وبلىسىنىڭ پوليتسييا دەپارتامەنتٸندە قۋعىن-سٷرگٸن قۇرباندارىن ەسكە الۋ كٷنٸنە ورايلاستىرىلعان بٸرەگەي ٸستەر كٶرمەسٸ ٶتۋدە. مۇراعاتتا قۋعىن-سٷرگٸن جىلدارىندا زاڭسىز سوتتالعان تٶرت مىڭنان استام ادامعا قاتىستى قىلمىستىق ٸستەر بار.
مۇراجاي ساقتاۋشىسى تاڭاتقان دەلمۇحامبەتوۆ كەلۋشٸلەرگە ايتۋىنشا, قۋعىن-سٷرگٸننٸڭ ٶرشٸگەن كەزٸ – 1937 جىلى اتالمىش ٸستەر بويىنشا سوتتالعاندارعا ەڭ قاتاڭ جازالاۋ شارالارى تاعايىندالعان. قۋعىن-سٷرگٸن قۇرباندارىنا قاتىستى قىلمىستىق ٸستەردٸڭ باسىم بٶلٸگٸ ركفسر قك-نٸڭ 58-بابى بويىنشا قوزعالعان. ول انتيكەڭەستٸك ناسيحاتتاۋعا جاۋاپكەرشٸلٸكتٸ قاراستىردى.
«ۆەدومستۆونىڭ ارنايى مەملەكەتتٸك مۇراعاتىندا ساقتاۋدا زاڭسسىز سوتتالعان 4 349 ادامعا قاتىستى قىلمىستىق ٸستەر بار. كەيٸننەن ولار اقتالدى. بۇل – بٸزدٸڭ ەلٸمٸزدٸڭ تاريحىنداعى ماڭىزدى كٷندەردٸڭ بٸرٸ. بٸز ساياسي قۋعىن-سٷرگٸن قۇرباندارىن ەرقاشان ەسٸمٸزدە ساقتايمىز», - دەدٸ ت. دەلمۇحامەدوۆ.
مىسالى, مۇراعاتتا حابيبۋلا باشاەۆقا قاتىستى قىلمىستىق ٸس ساقتالعان. ٸسپەن بٸرگە كٶرمەگە باشاەۆتىڭ فوتوسۋرەتتەرٸ مەن 1937 جىلى 27 قازاندا جازىلعان كٸنەسٸز ەكەنٸ تۋرالى ارىزدىڭ تٷپنۇسقاسى قويىلعان. 1938 جىلدىڭ اقپانىندا كسرو جوعارى سوتىنىڭ ەسكەري كوللەگيياسىمەن اتۋ جازاسىنا كەسٸلگەن, 1958 جىلدىڭ 1 ناۋرىزىندا اقتالدى.
قۋعىن-سٷرگٸنگە ۇشىراپ, كەيٸننەن اقتالعان ادامدار تۋرالى قىسقا اقپارات قر ٸٸم-نٸڭ ۆەدومستۆولىق web-پورتالى «مەموريال» رەسپۋبليكالىق سەرۆيسٸندە بەرٸلگەن. ونىڭ ارقاسىندا ەلٸمٸزدٸڭ كەز كەلگەن ازاماتى ٶزٸنٸڭ قۋعىن-سٷرگٸنگە ۇشىراعان تۋىستارى تۋرالى مەلٸمەتتەر تابا الادى.
1921-1954 جىلدار ارالىعىندا قازاقستاندا 100 مىڭ ادام سوتتالىپ, ولاردىڭ 25 مىڭى جازانىڭ ەڭ اۋىر تٷرٸ – اتۋ جازاسىنا كەسٸلگەن.
قوستاناي وبلىسىندا ەڭ اۋىر جازاعا 1 251 ادام كەسٸلگەن, بۇل – قۋعىن-سٷرگٸنگە ۇشىراعانداردىڭ جالپى سانىنىڭ 30%-دان استامى.
