Qostanai oblysy politsiia departamentiniń murajaiynda Qýǵyn-súrgin qurbandaryn eske alý kúnine orai ekskýrsiia ótýde, dep habarlaidy "Ult aqparat" vedomstvonyń baspasóz qyzmetine silteme jasap.
Qostanai oblysynyń politsiia departamentinde Qýǵyn-súrgin qurbandaryn eske alý kúnine orailastyrylǵan biregei ister kórmesi ótýde. Muraǵatta qýǵyn-súrgin jyldarynda zańsyz sottalǵan tórt myńnan astam adamǵa qatysty qylmystyq ister bar.
Murajai saqtaýshysy Tańatqan Delmuhambetov kelýshilerge aitýynsha, qýǵyn-súrginniń órshigen kezi – 1937 jyly atalmysh ister boiynsha sottalǵandarǵa eń qatań jazalaý sharalary taǵaiyndalǵan. Qýǵyn-súrgin qurbandaryna qatysty qylmystyq isterdiń basym bóligi RKFSR QK-niń 58-baby boiynsha qozǵalǵan. Ol antikeńestik nasihattaýǵa jaýapkershilikti qarastyrdy.
«Vedomstvonyń arnaiy memlekettik muraǵatynda saqtaýda zańssyz sottalǵan 4 349 adamǵa qatysty qylmystyq ister bar. Keiinnen olar aqtaldy. Bul – bizdiń elimizdiń tarihyndaǵy mańyzdy kúnderdiń biri. Biz saiasi qýǵyn-súrgin qurbandaryn árqashan esimizde saqtaimyz», - dedi T. Delmuhamedov.
Mysaly, muraǵatta Habibýla Bashaevqa qatysty qylmystyq is saqtalǵan. Ispen birge kórmege Bashaevtyń fotosýretteri men 1937 jyly 27 qazanda jazylǵan kinásiz ekeni týraly aryzdyń túpnusqasy qoiylǵan. 1938 jyldyń aqpanynda KSRO Joǵary Sotynyń áskeri kollegiiasymen atý jazasyna kesilgen, 1958 jyldyń 1 naýryzynda aqtaldy.
Qýǵyn-súrginge ushyrap, keiinnen aqtalǵan adamdar týraly qysqa aqparat QR IIM-niń vedomstvolyq web-portaly «Memorial» respýblikalyq servisinde berilgen. Onyń arqasynda elimizdiń kez kelgen azamaty óziniń qýǵyn-súrginge ushyraǵan týystary týraly málimetter taba alady.
1921-1954 jyldar aralyǵynda Qazaqstanda 100 myń adam sottalyp, olardyń 25 myńy jazanyń eń aýyr túri – atý jazasyna kesilgen.
Qostanai oblysynda eń aýyr jazaǵa 1 251 adam kesilgen, bul – qýǵyn-súrginge ushyraǵandardyń jalpy sanynyń 30%-dan astamy.
