قوستاناي وبلىسىنداعى تاران اۋدانىنا بەيٸمبەت مايليننٸڭ ەسٸمٸ بەرٸلەدٸ, دەپ حابارلايدى قازاقپارات.
بٷگٸن تاران اۋدانى مەدەنيەت ٷيٸندە تۇرعىنداردىڭ قاتىسۋىمەن قوعامدىق تىڭداۋ ٶتتٸ. تىڭداۋدىڭ باستى ماقساتى - تاران اۋدانىنىڭ اتاۋىن ٶزگەرتۋ. بٸرنەشە ساعاتقا سوزىلعان جيىن نەتيجەسٸندە اۋداندى بەيٸمبەت مايلين ەسٸمٸمەن اتاۋ جٶنٸندە شەشٸم قابىلداندى. وسى كٷنٸ تاران اۋدانىنداعى تاران اۋىلىنا ەيەت ەسٸمٸن بەرۋ مەسەلەسٸ دە تالقىلانىپ, تۇرعىندار تاراپىنان وڭ شەشٸمٸن تاپتى. جيىندا اقىن اقىلبەك شاياحمەت, بەيٸمبەتتانۋشى-عالىم جۇمابەك تابىن, پروفەسسور قالقامان جاقىپتار سٶز سٶيلەپ, باستامانىڭ ماڭىزىنا توقتالدى.
«بۇل - بٸراز جىلدان بەرٸ ايتىلىپ كەلە جاتقان مەسەلە. بٷگٸنگٸ قوعامدىق تىڭداۋدا بۇل تٷيتكٸلگە نٷكتە قويىلدى دەسەك ورىندى. ٶيتكەنٸ, اۋدان تۇرعىندارى بٸراۋىزدان قولدادى. ەسٸرەسە, باستاماعا ٷن قوسقان جاستارعا, مەسليحات دەپۋتاتتارىنىڭ جۇمىسىنا ريزا بولدىم. تاريحي, ساياسي تۇرعىدان الىپ قاراعاندا, اۋدانعا بەيٸمبەت مايلين ەسٸمٸنٸڭ بەرٸلۋٸ دۇرىس. جازۋشىنىڭ 125 جىلدىق مەرەيتويىن ايتپاعاننىڭ ٶزٸندە, قازاق حالقىنا سٸڭٸرگەن ەڭبەگٸنە باعا جەتپەيدٸ», - دەدٸ وبلىستىق ونوماستيكالىق كوميسسييانىڭ مٷشەسٸ قالقامان جاقىپ.
قالقامان جاقىپتىڭ سٶزٸنشە, ەندٸ تيٸستٸ قۇجاتتار دايىندالىپ, ۇسىنىس رەسپۋبليكالىق ونوماستيكالىق كوميسسييادا قارالادى. اۋدان اتاۋىن رەسمي تٷردە ٶزگەرتۋ ٷشٸن 4-5 اي ۋاقىت قاجەت.
