قالالىق قوعامدىق دەنساۋلىقتى ساقتاۋ باسقارماسىنىڭ باسشىسى تٸلەۋحان ەبٸلداەۆ ناۋقاس ادامدارمەن بايلانىستا بولعان تۇلعالاردىڭ بارلىعى انىقتالىپ, كارانتينگە جاتقىزىلعانىن ايتتى, دەپ حابارلايدى "ۇلت اقپارات".
«سوڭعى 4 جاعدايدىڭ ەكەۋٸندە جۇقتىرعان ادامدار شەتەلدەن كەلگەن. 1986 جىلعى ەيەل لوندون قالاسىنان ستامبۋل ارقىلى ترانزيتتٸك رەيسپەن 15 ناۋرىزدا تاڭعى 06.00-دە كەلگەن. جۇقپالى اۋرۋلار اۋرۋحاناسىنا جاتقىزىلدى. جاعدايى بٸرقالىپتى. 2 جاستاعى قىز بالا كۋرشەۆەل-بەرلين-الماتى باعىتىنداعى چارتەرلٸك رەيسپەن كەلگەن. بۇل رەيس جولاۋشىلارى مەن ەكيپاجى تٷگەل اۋرۋحاناعا جاتقىزىلدى», - دەدٸ ت.ەبٸلداەۆ الماتىدا ٶتكەن ونلاين بريفينگ بارىسىندا.
