يندونەزييا پوليتسيياسى ياۆا جەنە بالي ارالدارىنىڭ جولدارى مەن 400-دەن استام باقىلاۋ-ٶتكٸزۋ بەكەتتەرٸندە بلوكپوستار ورناتتى. بۇل سەنبٸ كٷنٸ جٷزدەگەن ميلليون ادامنىڭ ٷيلەرٸندە قالىپ, كوروناۆيرۋستىڭ تارالۋىن بولدىرماۋ ماقساتىندا قولدانىلعان شارا, دەپ حابارلايدى Reuters اگەنتتٸگٸ.
كوروناۆيرۋستىڭ ازييادا ەڭ قاتتى ۋشىعۋىنا قارسى كٷرەس كەزەڭٸندە ەلەمدە حالىق سانى جاعىنان تٶرتٸنشٸ ورىندا تۇرعان ەلدە سوڭعى 12 كٷننٸڭ ٸشٸندەگٸ سەگٸزٸندە ينفەكتسييا تارالۋىنىڭ رەكوردتىق سانى تٸركەلگەن. بۇل رەتتە جۇما كٷنٸ ۆيرۋسقا شالدىعۋدىڭ 25 830 وقيعاسى مەن 539 ٶلٸم جاعدايى تٸركەلگەن.
«بٸز ەدەتتە ادام ەڭ كٶپ جينالاتىن 21 ورىنعا پاترۋل ورناتتىق», - دەدٸ جۇما كٷنٸ كەشكە ٶتكەن باسپاسٶز مەسليحاتىندا يندونەزييا ۇلتتىق پوليتسيياسىنىڭ باسشىسى يستيونو.
پوليتسييا ٶكٸلٸ جاڭا شەكتەۋلەردٸڭ ساقتالۋىن قامتاماسىز ەتۋ ماقساتىندا 21 مىڭنان استام پوليتسەي مەن ەسكەري قىزمەتكەرلەردٸڭ يندونەزييانىڭ حالىق سانى ەڭ كٶپ ياۆا ارالى مەن تۋريستٸك كۋرورتتىق بالي ارالدارىن قورشاۋعا الاتىنىن مەلٸم ەتتٸ.
العاش رەت ٷندٸستاندا انىقتالعان Delta شتامى يندونەزييادا تەز تارالىپ جاتىر. ەلدە قاۋٸپتٸ ۆيرۋسقا شالدىققاندار سانى 2,2 ميلليون ادام, ال ودان قايتىس بولعاندار سانى 59 500 ادامنان اسقان.
