سوڭعى مەلٸمەتتەر بويىنشا, ارمەنييادا كوروناۆيرۋستى انىقتاۋعا باعىتتالعان جالپى 211 زەرتحانالىق سىناما جٷرگٸزٸلٸپ, سونىڭ بٸرەۋٸ عانا وڭ نەتيجە كٶرسەتتٸ. دٷيسەنبٸدەن باستاپ وقۋ مەكەمەلەرٸندە ساباق باستالادى, دەپ حابارلايدى "ۇلت اقپارات".
دٷيسەنبٸ كٷنٸ كوروناۆيرۋس تارالۋىنىڭ الدىن الۋ جٶنٸندەگٸ ۆەدومستۆوارالىق كوميسسييانىڭ وتىرىسىندا ارمەنييانىڭ دەنساۋلىق ساقتاۋ مينيسترٸ ەلدە ٸندەت جۇقتىرۋدىڭ جاڭا وقيعالارى تٸركەلمەگەنٸن مەلٸم ەتتٸ.
«وسى ۋاقىتقا دەيٸن ارمەنييادا جالپى 211 زەرتحانالىق سىناما جٷرگٸزٸلٸپ, سونىڭ بٸرەۋٸنەن عانا كوروناۆيرۋس انىقتالعان», - دەدٸ ەلدٸڭ دەنساۋلىق ساقتاۋ مينيسترٸ ارسەن توروسيان.
ارمەنييا ٷكٸمەتٸنٸڭ شەشٸمٸ بويىنشا, 9 ناۋرىزدان باستاپ بٷكٸل رەسپۋبليكاداعى بٸلٸم بەرۋ مەكەمەلەرٸندە وقۋ پروتسەسٸ قالپىنا كەلتٸرٸلدٸ. بۇعان دەيٸن ارمەنييا ٷكٸمەتٸ كوروناۆيرۋستىڭ ەلدە العاشقى تٸركەلگەن وقيعاعا بايلانىستى وقۋ پروتسەسٸن ۋاقىتشا توقتاتىپ, كٶكتەمگٸ دەمالىستى جوسپارلانعان مەرزٸمنەن بٸر اپتا ەرتە اۋىستىرۋ شەشٸمٸن قابىلدادى.
«بٸز ٷردٸستەردٸ مۇقييات باقىلاپ, دەنساۋلىق ساقتاۋ مينيسترٸمەن بٸرگە ەپيدەميولوگييالىق جاعدايدى قاداعالادىق, جرۆي-عا شالدىققان ازاماتتار سانىنىڭ قىسقارعانىن بەلگٸلەدٸك. وقۋ مەكەمەلەرٸندە ساباق توقتاتۋعا سەبەپ جوق», - دەپ جازدى Facebook-تەگٸ پاراقشاسىندا بٸلٸم مينيسترٸ ارايك ارۋتيۋنيان.
سونىمەن بٸرگە, ٷكٸمەت شەشٸمٸ بويىنشا, ارمەنييا مەن يران اراسىنداعى ۆيزاسىز رەجيم تۋرالى مەموراندۋمنىڭ كٷشٸ ۋاقىتشا توقتاتىلىپ, يرانمەن كوممۋنيكاتسييالارعا ۋاقىتشا شەكتەۋ قويۋ مەرزٸمٸن ۇزارتتى.
ەسكە سالا كەتەيٸك, 1 ناۋرىزعا قاراعان تٷنٸ ارمەنييادا كوروناۆيرۋس جۇقتىرۋدىڭ العاشقى جاعدايى انىقتالدى. بٸر كٷن بۇرىن يراننان كەلگەن ارمەنييا ازاماتىنىڭ تەستٸ وڭ نەتيجە كٶرسەتتٸ.
