ۋحاننان ەۆاكۋاتسييالانعان قازاقستاننىڭ 83 ازاماتىنىڭ 12-سٸ جرۆي-گە بايلانىستى ەم قابىلداپ جاتىر. بۇل تۋرالى قر دەنساۋلىق ساقتاۋ مينيسترلٸگٸنٸڭ رەسمي ٶكٸلٸ دياس احمەتشەرٸپ ايتتى, دەپ حابارلايدى قازاقپارات.
«مەديتسينالىق ۇيىمدار قىتايدان 6 قاڭتاردان كەيٸن تۇرعىلىقتى جەرٸنە كەلگەن ازاماتتاردىڭ دەنساۋلىعىن باقىلاۋدى جالعاستىرۋدا. بارلىعى 24 154 ادامعا باقىلاۋ جاسالدى. 15 878-ٸ مونيتورينگتەن شىعارىلدى. سوڭعى 14 كٷندە 8 276 ادام قارالىپ, 1 609 ادام مەديتسينالىق تٸركەۋگە الىندى. جالپى, 13 اقپاندا 151 ادام دەنە قىزۋى كٶتەرٸلٸپ, جرۆي بەلگٸلەرٸمەن اۋرۋحاناعا تٷستٸ. 131 ادام اۋرۋحانادان شىعارىلدى. 20 ادام اۋرۋحانادا. ناۋقاستاردىڭ جاعدايى جاقسى»,- دەدٸ مينيسترلٸكتٸڭ رەسمي ٶكٸلٸ.
ونىڭ اتاپ ٶتۋٸنشە, ەۆاكۋاتسييالانعان قازاقستان رەسپۋبليكاسىنىڭ 83 ازاماتىنىڭ 12-سٸ جرۆي-گە بايلانىستى ەم قابىلداپ جاتىر. سونداي-اق ۋحاننان ەۆاكۋاتسييالانعان بەلارۋستىڭ 5, ارمەنييانىڭ 1 ازاماتىنىڭ جاعدايى جاقسى.
«ۋحاننان ەۆاكۋاتسييالانعان قازاقستان رەسپۋبليكاسىنىڭ رەسەيدٸڭ تٷمەن قالاسىنداعى - 3, ٶزبەكستاننىڭ تاشكەنت قالاسىنداعى 5 ازاماتىنىڭ دەنساۋلىقتارى جاقسى. ولاردىڭ شاعىمدارى جوق», - دەدٸ دياس احمەتشەرٸپ.
