قازاقستان قورعانىس مينيسترٸ نۇرلان ەرمەكباەۆ وتستاۆكاعا كەتتٸ. بۇل تۋرالى مەملەكەت باسشىسىنىڭ باسپاسٶز حاتشىسى بەرٸك ۋەلي مەلٸمدەدٸ, - دەپ حابارلايدى "ۇلت اقپارات".
"مەملەكەت باسشىسى قاسىم-جومارت توقاەۆ قورعانىس مينيسترٸ نۇرلان ەرمەكباەۆتىڭ قىزمەتتەن بوساتۋ جٶنٸندەگٸ راپورتىن قاراستىرىپ, ونىڭ ٶتٸنٸشٸن قابىلدادى", - دەپ جازدى بەرٸك ۋەلي Facebook-تە.
بۇعان دەيٸن قورعانىس مينيسترٸ نۇرلان ەرمەكباەۆ تاراز ماڭىنداعى ەسكەري قويمادا جارىلىس بولعانىن ەستٸگەننەن كەيٸن وتستاۆكاعا كەتۋ تۋرالى شەشٸم قابىلداعانىن ايتتى.
26 تامىز كەشكٸ جەتٸلەر شاماسىندا جامبىل وبلىسى بايزاق اۋدانىندا ەسكەري بٶلٸم قويمالارىنىڭ بٸرٸندە ٶرت شىعىپ, ارتىنشا وننان استام جارىلىس بولدى. بەلگٸلٸ بولعانداي, قويمادا ينجەنەرلٸك وق-دەرٸ ساقتالعان.
سوڭعى مەلٸمەت بويىنشا تٶتەنشە جاعدايدان 15 ادام قازا تاپتى. بارلىعىنىڭ جەكە باسى انىقتالدى.
سونداي-اق, جٷزگە تارتا ادام جاراقات الدى, بٸر ادام حابار-وشارسىز كەتتٸ. قازا تاپقانداردىڭ بەرٸ – قورعانىس مينيسترلٸگٸ مەن تٶتەنشە جاعداي مينيسترلٸگٸ ٶرت سٶندٸرۋ بٶلٸمٸنٸڭ قىزمەتكەرلەرٸ.
جامبىل وبلىسى ەكٸمدٸگٸنٸڭ ايتۋىنشا, اپات سالدارىنان 106 تۇرعىن ٷي, 12 كوممەرتسييالىق وبەكت, ٷش مەكتەپ بٷلٸنگەن. ەكٸمدٸك ٷيلەردٸ ەكٸ اي ٸشٸندە قالپىنا كەلتٸرۋگە ۋەدە بەردٸ.
ەرمەكباەۆ اپاتتىڭ سەبەبٸ رەتٸندە ٷش نۇسقا قاراستىرىلىپ جاتقانىن ايتقان. ولار: جارىلىسقا قويمادا قاۋٸپسٸزدٸك تالاپتارىنىڭ ساقتالماۋى, يا حيمييالىق رەاكتسييامەن ٶزدٸگٸنەن تۋۋى نەمەسە ديۆەرسييا.
بۇل – ەرمەكباەۆتىڭ قورعانىس مينيسترٸ قىزمەتٸندەگٸ ەكٸنشٸ اپات. 2019 جىلى وسىعان ۇقساس جاعداي تٷركٸستان وبلىسى ارىس قالاسىندا بولعان. ول جەردە ەسكەري قويمادا جارىلىس بولىپ, تٶرت ادام قايتىس بولعان, ونداعان ادام جاراقاتتانعان. اپات سالدارىنان ونداعان مىڭ ادام ٷيٸن تاستاپ, بوسىپ كەتكەن.
جامبىل وبلىسىنداعى جارىلىستان كەيٸن 29 تامىز اپات كەزٸندە مەرت بولعان ازاماتتاردى ازا تۇتۋ كٷنٸ بولىپ جارييالاندى. بۇل - تەۋەلسٸز قازاقستان تاريحىنداعى ونىنشى قارالى كٷن.
سول كٷنٸ قازاقستان پرەزيدەنتٸ قاسىم-جومارت توقاەۆ اپاتتان قازا تاپقان قىزمەتكەرلەردٸ ماراپاتتاۋ جٶنٸندە قاۋلى شىعاردى.
