فوتو: abai.kz
قر قورعانىس مينيسترٸ گەنەرال-پولكوۆنيك رۋسلان جاقسىلىقوۆ تەرتٸپ جەنە ەسكەري تەرتٸپ مەسەلەلەرٸ قارالعان اتتەستاتسييالىق كوميسسييانىڭ وتىرىسىن ٶتكٸزدٸ, دەپ حابارلايدى Kazinform اگەنتتٸگٸ.
ۆەدومستۆو باسشىسى ٶز باعىنىشتىلارىن جارعىلىق ەمەس قاتىناستارعا جول بەرگەنٸ ٷشٸن سىنعا الىپ, وفيتسەرلٸك قۇزىرەتتٸلٸكتەردٸ قولدانۋ قاجەتتٸگٸن اتاپ ٶتتٸ.
"سٸزدەر, ەڭ الدىمەن, ٶزدەرٸڭٸزدٸڭ باعىنىشتىلارىڭىزعا قامقورلىق جاساۋعا, ولاردىڭ قىزمەتٸنە بارلىق جاعدايلاردى جاساۋعا, كەسٸبي ٶسۋٸنە ىقپال ەتۋگە مٸندەتتٸسٸزدەر", - دەدٸ جاقسىلىقوۆ.
جەكە قۇراممەن جۇمىس جاساۋداعى ولقىلىقتارى ٷشٸن قورعانىس مينيسترٸنٸڭ ورىنباسارى, ەۋە قورعانىسى كٷشتەرٸنٸڭ باس قولباسشىسىنىڭ ورىنباسارى پولكوۆنيك تالعات سىزدىقوۆقا قىزمەتكە تولىق سەيكەس ەمەستٸگٸ جارييالاندى, ال ەۋە قورعانىس ەسكەرلەرٸنٸڭ قولباسشىسى گەنەرال-مايور نۇرتاس قاباقوۆتى قر جوعارعى باس قولباسشىسىنا ونى قىزمەتٸنەن بوساتۋ تۋرالى ۇسىنىس ەنگٸزدٸ.
قورعانىس مينيسترٸ ەسكەرلەردە قۇقىقتىق تەرتٸپتٸ, سونداي-اق ەسكەري قىزمەتشٸلەردٸڭ ٶمٸرٸ مەن دەنساۋلىعىن ساقتاۋعا باعىتتالعان شارالار جٷيەسٸن كٷشەيتۋگە قاتىستى بٸرقاتار تاپسىرمالار بەردٸ. بۇل تۋرالى وكق الاڭىندا ٶتكەن باسپاسٶز كونفەرەنتسيياسىندا قر قورعانىس مينيسترٸنٸڭ تەربيە جەنە يدەولوگييالىق جۇمىس جٶنٸندەگٸ ورىنباسارى, گەنەرال-مايور شايح-حاسان جازىقباەۆ حابارلادى.
"قارۋلى كٷشتەردە قۇقىق بۇزۋشىلىقتاردى توقتاتۋ اياسىندا كٶپتەگەن شارالار قولدانىلادى. مەسەلەن, "جاۋىنگەرلٸك دوس" جٷيەسٸ, ياعني, ەربٸر كەلگەن ەسكەري قىزمەتشٸنٸڭ قاسىندا ەكٸنشٸ جاۋىنگەرلٸك دوسى بولادى. ونىڭ باستى مٸندەتٸ – ونى باسقا بٸر جاعىمسىز جاعدايلاردان ساقتاپ, قورعاپ جٷرۋ. ودان باسقا, "پيراميدا" جٷيەسٸ بار", - دەدٸ سپيكەر.
سونىمەن قاتار ساربازدار "وتباسىمەن بەينەقوڭىراۋ" قىزمەتٸ ارقىلى تۋىستارىمەن حابارلاسا الادى. ەربٸر بٶلٸمدە اتا-انالار چاتتارى قۇرىلعان. قۇقىقبۇزۋشىلىق ەرەكەتتەرٸنٸڭ الدىن الۋ ماقساتىندا ەربٸر ەسكەري قىزمەتشٸ جٷگٸنە الاتىن پروفيلاكتيكالىق كابينەتتەر مەن سەنٸم تەلەفوندارى جۇمىس ٸستەيدٸ.
بۇدان بٶلەك, قىزمەتتٸك ٷي-جايلار, ونىڭ ٸشٸندە كازارما ورنالاسقان جەر بەينەكامەرالارمەن جابدىقتالعان. ول ٷشٸن شتاتتارعا وپەراتور لاۋازىمدارى ەنگٸزٸلگەن.
ايتا كەتەيٸك, 19 قىركٷيەكتە اباي وبلىسىنداعى اياگٶز گارنيزونىڭ ەسكەري قىزمەتكەرٸ قايتىس بولعانى بەلگٸلٸ بولدى.
