Foto: abai.kz
QR Qorǵanys ministri general-polkovnik Rýslan Jaqsylyqov tártip jáne áskeri tártip máseleleri qaralǵan attestatsiialyq komissiianyń otyrysyn ótkizdi, dep habarlaidy Kazinform agenttigi.
Vedomstvo basshysy óz baǵynyshtylaryn jarǵylyq emes qatynastarǵa jol bergeni úshin synǵa alyp, ofitserlik quzyrettilikterdi qoldaný qajettigin atap ótti.
"Sizder, eń aldymen, ózderińizdiń baǵynyshtylaryńyzǵa qamqorlyq jasaýǵa, olardyń qyzmetine barlyq jaǵdailardy jasaýǵa, kásibi ósýine yqpal etýge mindettisizder", - dedi Jaqsylyqov.
Jeke qurammen jumys jasaýdaǵy olqylyqtary úshin Qorǵanys ministriniń orynbasary, Áýe qorǵanysy kúshteriniń bas qolbasshysynyń orynbasary polkovnik Talǵat Syzdyqovqa qyzmetke tolyq sáikes emestigi jariialandy, al áýe qorǵanys áskerleriniń qolbasshysy general-maior Nurtas Qabaqovty QR Joǵarǵy Bas qolbasshysyna ony qyzmetinen bosatý týraly usynys engizdi.
Qorǵanys ministri áskerlerde quqyqtyq tártipti, sondai-aq áskeri qyzmetshilerdiń ómiri men densaýlyǵyn saqtaýǵa baǵyttalǵan sharalar júiesin kúsheitýge qatysty birqatar tapsyrmalar berdi. Bul týraly OKQ alańynda ótken baspasóz konferentsiiasynda QR Qorǵanys ministriniń tárbie jáne ideologiialyq jumys jónindegi orynbasary, general-maior Shaih-Hasan Jazyqbaev habarlady.
"Qarýly kúshterde quqyq buzýshylyqtardy toqtatý aiasynda kóptegen sharalar qoldanylady. Máselen, "Jaýyngerlik dos" júiesi, iaǵni, árbir kelgen áskeri qyzmetshiniń qasynda ekinshi jaýyngerlik dosy bolady. Onyń basty mindeti – ony basqa bir jaǵymsyz jaǵdailardan saqtap, qorǵap júrý. Odan basqa, "Piramida" júiesi bar", - dedi spiker.
Sonymen qatar sarbazdar "Otbasymen beineqońyraý" qyzmeti arqyly týystarymen habarlasa alady. Árbir bólimde ata-analar chattary qurylǵan. Quqyqbuzýshylyq áreketteriniń aldyn alý maqsatynda árbir áskeri qyzmetshi júgine alatyn profilaktikalyq kabinetter men Senim telefondary jumys isteidi.
Budan bólek, qyzmettik úi-jailar, onyń ishinde kazarma ornalasqan jer beinekameralarmen jabdyqtalǵan. Ol úshin shtattarǵa operator laýazymdary engizilgen.
Aita keteiik, 19 qyrkúiekte Abai oblysyndaǵy Aiagóz garnizonyń áskeri qyzmetkeri qaitys bolǵany belgili boldy.
