قازٸرگٸ ۋاقىتتا مەكتەپتە وقۋ قىزىق ەمەس. Google كٶكە امان بولسىن. بالالار كٶشٸرە سالادى. بۇل ٸسپەن بۇرىن ستۋدەنتتەر اينالىسۋشى ەدٸ. بۇرناعى كٷنٸ ٶز كٶزٸممەن كٶردٸم. بالام ينتەرنەتتەن ەسسە كٶشٸرٸپ وتىر ەكەن. ٷندەمەدٸم. باستاۋىشتاعى وقۋشى ەسسە تابيعاتىن قايدان بٸلسٸن! ەڭ جامانى, كٶشٸرمە دٷنيەسٸن مۇعالٸمٸ ماداقتاپ وڭ باعالاپ جاتسا, سول - قاسٸرەت.
ۋنيۆەرسيتەت ستۋدەنتتەرٸ ٷشٸن ينتەرنەت ماتەريالى ديپلومعا ازىق, ەمتيحانعا قازىق بولۋدا. ستۋدەنتتەردٸ قويشى, عالىمداردىڭ كٷنٸ عالامتورسىز قاراڭ. ەينشتەين پلاگياتتىڭ كٶكەسٸ تەحنولوگييانىڭ تٶرەسٸ بولاتىنىن بٸلمەي عاپىل قالدى-اۋ. دوكتورلاردان ۇيات, پروفەسسورلاردان مۇرات كەتكەلٸ عىلىمنىڭ سورابىن مٷك باسقالى قاشان!
بالاباقشادان كەلگەن بٶبەگٸم تەربيەشٸسٸنٸڭ تاقپاق جاتتاۋ تاپسىرعانىن ايتتى. ماقۇل. بٸراق قاعازعا باسىپ اپ كەلگەن تاقپاقتىڭ تٶرت تارماعى تٶرت جاققا قاراپ تۇر ەكەن. ينتەرنەتتەن كٶشٸرگەنٸن بٸردەن بٸلدٸم. تەربيەشٸسٸنە حابارلاسىپ, نارازىلىق تانىتىپ ەم, "تاڭداۋىم دۇرىس" دەپ بەت باقتىرمادى. مەنٸڭ ٶلەڭ شاتپاقتاپ جٷرگەن دٷلدٷل ەكەنٸمدٸ قايدان بٸلسٸن. سٶز ساراسىن بٸلمەگەن سوڭ, ساڭىلاۋ قايدان بولسىن.
اۋداندىق گازەت رەداكتسيياسىندا قىزمەت ەتكەنٸمدە, پروكۋرور گازەتكە باسۋعا ماقالا الىپ كەلدٸ. تانىس دٷنيە سەكٸلدٸ. بىلتىرعى گازەت سانىنا ٷڭٸلسەم, بٸر دەپۋتاتتىڭ ماقالاسى ەكەن. قاز قالپىندا. پٸراقاڭداردىڭ بەدەلٸ مىقتى عوي. سول كٷيٸ قايتا باسىلىپ كەتە باردى.
مەدەني قايىرشىلىق دەگەن بولۋشى ەدٸ. قازٸرگٸ كەزدە "مەدەني ۇرلىق" پايدا بولدى. جۋرناليستەر اراسىندا تٸپتٸ سوتسياليستٸك جارىس سەكٸلدٸ سيپات الدى. ماقالاڭنىڭ شەپكەسٸ تەرٸس اينالىپ, ٶزگە سايتتاردا ٸلۋلٸ تۇرادى. مەدەني قىلمىس ەندٸ بۇل, ەرٸپتەستەر! بٸر پرەسس رەليزدٸڭ قانشاما كٶشٸرمەسٸ بٸزدٸ اسىراپ وتىر, ە?
ەنشٸلەردٸڭ داۋسى دا كسەروكستەن ٶتەدٸ-اۋ. تويدىڭ ەۋەنٸ تونىن اۋىستىرمايدى. ەسترادا ەنٸ ەسەرلٸگٸنەن تانبايدى. ٶزبەككە جيەن, قىرعىزعا باۋىر, ورىسقا تامىر, شەتەلگە ٷيٸر بولعان سوڭ, ماگدانەللولار مەڭگٸرٸپ, وريگينالدار ٶكٸرٸپ جٷرەدٸ. ٶنەردەگٸ كٶشٸرمە - ٶمٸردەگٸ كٶشٸرمە.
سەن ەلەمٸندەگٸ كٶشٸرمەدەن كٶز اشپايمىز. قايسى ارۋ, قايسى جانعا دەرۋ ەكەنٸنەن اجىرتۋدان قالدىق. بٸر پوشىمدى ەرٸن, بٸر پٸشٸندٸ قاس-قاباق, بٸردەي شانشىلعان نايزا-كٸرپٸك, بٸر قالىپتا قيىلعان شاش ٷلگٸسٸ. ەيەل ەلەمٸندەگٸ ەدەمٸلٸك, قىز بەتٸندەگٸ قىزىل وپانىڭ كٶشٸرمە استىندا قالعانى كەدٸك.
كٶشٸرمە دەرتٸ تەندەر ەلەمٸنە دە جەتتٸ. بٸرٸن بٸرٸ اينىمايتىن اق, جاڭىلمايتىن جشس قاپتادى. شوشقاشا بالالاپ, بٸر ەمشەكتٸ ەمٸپ وتىراتىن حولدينگتەر بيتتەن بەتەر ٶرۋدە. سەۋلەت-سەنٸ كەلٸسكەن عيماراتتار بٸر قالىپتان شىققانداي, ەر اۋدانعا تاپجىلماي قونجييادى. بٸراق قۇنى جەر مەن كٶكتەي بولادى-دٷر. كٶشٸرمەمەن شەنەۋنٸكتەر دە اۋىرىپ جٷر. بٸر-بٸرٸمەن جارىسىپ, بالانى شەتەل اسىرۋدان ۇيالمايدى, كوتتەدج سالۋدان قينالمايدى.
كٶشٸرمەگە داۋ جوق ەكەن! بيزنەستٸڭ ساباسىن ساپىراتىندار كٶبەيدٸ. جان داۋاسىن ەمدەيتٸندەر ەلەڭدەتتٸ. "ٶزگەر" دەسەدٸ. بٸراق بٸر سوناردان شىققانداي, تەپ-تەۋٸر تۇرسىنباەۆالار, مايىسپايتىن ماتايلار, ەلدەن ەرەك ەسەنتاەۆالار ەسەلەندٸ. تابىنۋشىلارىن بٸر ٸزبەن جٷرگٸزەتٸن جەكە يلەۋ, جەكە پاتشالىق قۇرىپ العان دەسەدٸ.
بەرٸ دجينسى كيگەندەردەن باستالدى. باسىندا بٸتەۋ ەدٸ. بالاعى كەسٸلدٸ. تٸزەسٸ جىرتىلدى. بۇتىنا قول سالارداي بولدى. كيٸم تٷرلەندٸ. قالىپ ٸرٸلەندٸ. الدى-ارتى قىز بولدى. وڭ-سولى ەركەك بولدى. قىز بەن جٸگٸت ەلدەن ەرەك بولدى. ساحنادا شاشىن جۇلقىپ بيلەدٸ, كٸم كٶرٸنگەندٸ سٷيرەدٸ. مۇرىنعا ساقينا, بەتكە تاتۋاج تٷستٸ. افريكالىق. امەريكالىق. ەۋروپالىق بولدى. بەرٸ دە بٸر-بٸرٸنەن اجىراعىسىز. امال قايسى? كٶشٸرمە!
كٶشٸرمە عىلىمىن زەرتتەگٸم كەلٸپ جٷر. شوشقا تاعالاپ جاتقىم كەلمەيدٸ. بايلاردىڭ مەتوديكاسىن, بٸلٸمدٸلەردٸڭ پەداگوگيكاسىن, كٷشتٸلەردٸڭ مەنتاليتەتٸن كٶشٸرٸپ العىم كەلەدٸ. شامام كەلمەي جاتىر. بەت-ەلپەتٸمدٸ شولايىن دەپ, ايناعا قاراپ ەم. شوشىدىم. بەينەم جوق. عايىپ بوپتى. جٶتكٸرٸنٸپ ەم, داۋسىم جوق بوپ شىقتى. كٸنەلٸنٸ تاپتىم. كلونىم شىققان ەكەن. سول پەلەكەت ۇرلاپ كەتٸپتٸ بەرٸن!
مەڭگٸرٸپ جٷرمٸن. كلونىمدى ٸزدەيمٸن! قوعام سونداي.
سولار. سولار - ديريجەر! قۇدٸرەت! بەرٸن كٶشٸرمە قىلعىسى كەلەدٸ. قىلدى دا. بٸردەي داۋىستايتىن. بٸردەي سٶيلەيتٸن. بٸر سىزىقپەن جٷرەتٸن. لەم دەمەيتٸن. لەپپەي دەيتٸن. بٸردەي كيٸنەتٸن ادامدار كەرەك. قالىپقا تٷسكەن قوعام ٷشٸن بەرٸن كٶشٸرٸپ باسىپ جاتىر. بەرٸن دە! قىتايلاردى جولدا قالدىردىق
ۇيات!
ديريجەر, قايداسىز?! قۇتقارىڭىز!..
نۇرتاي تەكەباەۆ
