بٷگٸن ەلوردالىق «بارىس» قۇرلىقتىق حوككەي ليگاسىنداعى كەزەكتٸ ويىنىندا رەسەيدٸڭ «سالاۆات يۋلاەۆ» (ۋفا) كومانداسىمەن كەزدەستٸ, دەپ حابارلايدى قازاقپارات.
«بارىس» كەيٸنگٸ كەزدەرٸ جاقسى ويىن ٶرنەگٸن كٶرسەتٸپ كەلەدٸ. سوڭعى جەتٸ ماتچتا ەلوردالىق كلۋب التى مەرتە جەڭٸسكە جەتتٸ. نەبەرٸ بٸرەۋٸندە عانا قارسىلاسىنا ەسە جٸبەردٸ.
بٷگٸنگٸ كەزدەسۋدە دە «بارىس» تەپ-تەۋٸر ويىن كٶرسەتتٸ. ەسەپتٸ العاش بولىپ ەلوردالىق حوككەيشٸلەر اشتى. ويىننىڭ 11-مينۋتىندا داررەن ديتس ٶز كومانداسىە العا شىعاردى. ال ەكٸنشٸ كەزەڭدە «سالاۆات يۋلاەۆ» ساپىنان ساكاري ماننينەن تارازى باسىن تەڭەستٸرگەن ەدٸ. ال 44-مينۋتتا قازاقستاندىق كلۋب قاتارىنان كيورتيس ۆالك مەرگەندٸك تانىتتى. وسىلايشا «بارىس» قارسىلاسىن 2:1 ەسەبٸمەن تٸزە بٷكتٸردٸ. بٷگٸنگٸ جەڭٸستەن كەيٸن ەلوردالىق كلۋب جالپى كوماندالىق ەسەپتە بەسٸنشٸ ورىنعا كٶتەرٸلدٸ. سونداي-اق, شىعىس كونفەرەنتسيياسىندا تٶرتٸنشٸ ورىنعا تۇراقتاسا, چەرنىشەۆ ديۆيزيونىندا كٶش باسىنا شىقتى.
بۇدان بۇرىن ەلوردالىق كلۋب چەرەپوۆەتستٸڭ «سەۆەرستال» كلۋبىن 5:1 ەسەبٸمەن جەڭگەن ەدٸ .
«بارىس» حوككەيشٸلەرٸ ەندٸ تاعى بٸر ويىندى سىرت ايدىندا ٶتكٸزەدٸ. ولار 11 قازاندا نوۆوسٸبٸردە جەرگٸلٸكتٸ «سيبير» كومانداسىمەن كەزدەسەدٸ.
ودان كەيٸن ەلوردادا ٷش ويىن قاتارىنان قارسىلاستارىن قابىلدايدى. ەلوردالىق كلۋب 14 قازاندا ۆلاديۆوستوكتىڭ «ادميرالىن» قابىلداسا, 16 قازاندا لاتۆييانىڭ «دينامو» (ريگا), 20 قازاندا پودولسكٸنٸڭ «ۆيتياز» كلۋبتارىمەن مۇز ايدىنعا شىعادى.
