بٷگٸن ەلوردالىق «بارىس» قۇرلىقتىق حوككەي ليگاسى پلەي-وفف ساتىسىندا رەسەيدٸڭ «مەتاللۋرگ» (ماگنيتوگورسك) كومانداسىمەن ٷشٸنشٸ كەزدەسۋٸن ٶتكٸزدٸ, دەپ حابارلايدى "ۇلت اقپارات".
ەستەرٸڭٸزگە سالا كەتەلٸك, بۇدان بۇرىن كوماندالار بيىلعى پلەي-وفف ساتىسىندا ەكٸ مەرتە مۇزايدىنعا شىقتى. ەلوردادا ٶتكەن العاشقى ويىندا «بارىس» قارسىلاسىن 4:0 ەسەبٸمەن تٸزە بٷكتٸرسە, ودان كەيٸن رەسەيلٸك حوككەيشٸلەرگە 0:3 ەسەبٸمەن جول بەردٸ.
وسىلايشا ويىندار سەريياسى 1:1 ەسەبٸمەن تەڭەستٸ.
سوندىقتان بٷگٸنگٸ كەزدەسۋ دە تارتىستى ٶتتٸ. ويىننىڭ العاشقى كەزەڭٸ تارتىسقا تولى بولدى. قوس كوماندا شابۋىلعا كٶبٸرەك شىقتى. دەگەنمەن بٸرٸنشٸ كەزەڭدە قوس كوماندا بٸر-بٸرٸنٸڭ قاقپاسىنان ساڭىلاۋ تابا العان جوق.
ەكٸنشٸ كەزەڭدە دە ويىن جاعدايى وسىعان ۇقساس بولدى. حوككەيشٸلەر ٶتە ساق وينادى. ەكٸ كەزەڭدە تٶرەشٸلەر بٸر مەرتە عانا حوككەيشٸنٸ ايدىننان قۋدى.
ٷشٸنشٸ كەزەڭنٸڭ 46-مينۋتىندا «مەتاللۋرگ» حوككەيشٸسٸ سەرگەي موزياكين كومانداسىن العا شىعارسا, 48-مينۋتىندا «بارىس» ساپىنان داررەن ديتس تارازى باسىن تەڭەستٸردٸ. كەزدەسۋ 1:1 ەسەبٸمەن تەڭ اياقتالدى. ويىن وۆەرتايمعا ۇلاستى. وۆەرتايمدا ەلوردالىق حوككەيشٸ لينۋس ۆيدەلل جەڭٸس شايباسىن سوقتى. نەتيجەسٸندە «بارىس» 2:1 ەسەبٸمەن جەڭٸسكە جەتتٸ.
ەندٸ 7 ناۋرىزدا ماگنيتوگورسك قالاسىندا تاعى بٸر ويىن بولادى. جارىس تالابى بويىنشا كەزەڭنٸڭ اتالمىش ساتىسىندا كوماندانىڭ بٸرەۋٸ تٶرت جەڭٸسكە جەتكەنگە دەيٸن سوزىلادى. قاجەت بولعان جاعدايدا قوسىمشا ويىندار 9, 11, 13 ناۋرىز كٷندەرٸ ٶتكٸزٸلەدٸ.
