Búgin elordalyq «Barys» qurlyqtyq hokkei ligasy plei-off satysynda Reseidiń «Metallýrg» (Magnitogorsk) komandasymen úshinshi kezdesýin ótkizdi, dep habarlaidy "Ult aqparat".
Esterińizge sala ketelik, budan buryn komandalar biylǵy plei-off satysynda eki márte muzaidynǵa shyqty. Elordada ótken alǵashqy oiynda «Barys» qarsylasyn 4:0 esebimen tize búktirse, odan keiin reseilik hokkeishilerge 0:3 esebimen jol berdi.
Osylaisha oiyndar seriiasy 1:1 esebimen teńesti.
Sondyqtan búgingi kezdesý de tartysty ótti. Oiynnyń alǵashqy kezeńi tartysqa toly boldy. Qos komanda shabýylǵa kóbirek shyqty. Degenmen birinshi kezeńde qos komanda bir-biriniń qaqpasynan sańylaý taba alǵan joq.
Ekinshi kezeńde de oiyn jaǵdaiy osyǵan uqsas boldy. Hokkeishiler óte saq oinady. Eki kezeńde tóreshiler bir márte ǵana hokkeishini aidynnan qýdy.
Úshinshi kezeńniń 46-minýtynda «Metallýrg» hokkeishisi Sergei Moziakin komandasyn alǵa shyǵarsa, 48-minýtynda «Barys» sapynan Darren Dits tarazy basyn teńestirdi. Kezdesý 1:1 esebimen teń aiaqtaldy. Oiyn overtaimǵa ulasty. Overtaimda elordalyq hokkeishi Linýs Videll jeńis shaibasyn soqty. Nátijesinde «Barys» 2:1 esebimen jeńiske jetti.
Endi 7 naýryzda Magnitogorsk qalasynda taǵy bir oiyn bolady. Jarys talaby boiynsha kezeńniń atalmysh satysynda komandanyń bireýi tórt jeńiske jetkenge deiin sozylady. Qajet bolǵan jaǵdaida qosymsha oiyndar 9, 11, 13 naýryz kúnderi ótkiziledi.
